കൊല്‍ക്കത്ത: ഐ ലീഗില്‍ മുന്‍ ചാംപ്യന്‍മാരായ മോഹന്‍ ബഗാനു തകര്‍പ്പന്‍ ജയം. മറുപടിയില്ലാത്ത നാലു ഗോളുകള്‍ക്ക് അവര്‍ പുതുമുഖങ്ങളായ മിനര്‍വ പഞ്ചാബിനെ തകര്‍ത്തു. മറ്റു മത്സരങ്ങളില്‍ ശിവാജിയന്‍സ് ചെന്നൈ സിറ്റി എഫ്.സിയെ 2-0ത്തിനും ഐസ്വാള്‍ 2-1നു ഷില്ലോങ് ലജോങിനേയും കീഴടക്കി.
ഡാരിയല്‍ ഡഫി, ജെ.ജെ ലാല്‍പെഖുല എന്നിവര്‍ നേടിയ ഇരട്ട ഗോളുകളുടെ മികവിലാണ് മോഹന്‍ ബഗാന്‍ വിജയിച്ചത്. ആദ്യ പകുതിയില്‍ തന്നെ മൂന്നു ഗോളുകളടിച്ച് മുന്‍തൂക്കം നേടാന്‍ മുന്‍ ചാംപ്യന്‍മാര്‍ക്ക് സാധിച്ചു.
തുടര്‍ച്ചയായ മൂന്നാം വിജയം സ്വന്തമാക്കിയ അവര്‍ ഒന്‍പതു പോയിന്റുകളുമായി പോയിന്റ് പട്ടികയില്‍ ഒന്നാം സ്ഥാനത്തെത്തി.