കോഴിക്കോട്: നോട്ട് പ്രതിസന്ധി സംബന്ധിച്ച് അഭിപ്രായപ്രകടനം നടത്തിയ ജ്ഞാനപീഠം അവാര്‍ഡ് ജേതാവ് എം. ടി വാസുദേവന്‍ നായര്‍ക്കെതിരേ വിവാദ പരാമര്‍ശം നടത്തിയ ബി.ജെ. പി നേതൃത്വം പരാമര്‍ശം പിന്‍വലിച്ച് മാപ്പ് പറയണമെന്ന് പ്രതിപക്ഷ നേതാവ് രമേശ് ചെന്നിത്തല. എം. ടി യുടെ വസതിയില്‍ സന്ദര്‍ശിച്ചശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
രാജ്യത്തെ ജനങ്ങളെ ഏറ്റവും കൂടുതല്‍ പ്രതികൂലമായി ബാധിച്ച കറന്‍സി അസാധുവാക്കലിനെക്കുറിച്ച് വാക്കിന്റെ കുലപതിയായ എം.ടിയെപ്പോലുള്ളവര്‍ പോലും സംസാരിക്കരുതെന്ന് വിലക്കുന്നത് ഫാസിസമാണെന്ന് അദ്ദേഹം കൂട്ടിച്ചേര്‍ത്തു. കറന്‍സി അസാധുവാക്കലിനെത്തുടര്‍ന്നുള്ള സാമ്പത്തിക പ്രതിസന്ധി തുടരുമെന്ന് ഉറപ്പായിരിക്കുകയാണെന്നും ഡെബിറ്റ് കാര്‍ഡ് പോലുള്ള പ്ലാസ്റ്റിക് മണി ഉപയോഗം സംബന്ധിച്ച് തന്നെപ്പോലുള്ള തലമുറയ്‌ക്കൊന്നും അറിവില്ലെന്ന് എം. ടി പറഞ്ഞു.