തിരുവനന്തപുരം: കേസുകളില്‍ കൃത്യസമയത്തു കുറ്റപത്രം സമര്‍പ്പിക്കണമെന്നു സംസ്ഥാന പൊലിസ്് മേധാവി ലോക്‌നാഥ് ബെഹ്‌റ.
ഗുരുതരമായ കുറ്റകൃത്യങ്ങളില്‍ സി.ആര്‍.പി.സി 173(2) നിഷ്‌കര്‍ഷിക്കുന്ന പ്രകാരം 690 ദിവസങ്ങള്‍ക്കുള്ളില്‍ കുറ്റപത്രം നല്‍കുന്നുവെന്ന് അന്വേഷണ ഉദ്യോഗസ്ഥരും മേലുദ്യോഗസ്ഥരും ഉറപ്പുവരുത്തണം.
ഇത്തരത്തില്‍ നിശ്ചിത സമയത്തിനുള്ളില്‍ കുറ്റപത്രം നല്‍കാതെ വരുന്നതിനാല്‍ പലപ്പോഴും ഗുരുതര കുറ്റകൃത്യങ്ങളില്‍ പ്രതിക്കു ജാമ്യം കിട്ടുന്ന സ്ഥിതി വരികയും ജാമ്യം ലഭിച്ച പ്രതി ഒളിവില്‍പ്പോവുകയോ സാക്ഷികളെ ഭീഷണിപ്പെടുത്തുകയോ ചെയ്യുന്ന സാഹചര്യം സൃഷ്ടിക്കപ്പെടുകയും ചെയ്യുമെന്നും ഡി.ജി.പി ചൂണ്ടിക്കാട്ടി.
പല സന്ദര്‍ഭങ്ങളിലും ഫോറന്‍സിക് പരിശോധനാ റിപ്പോര്‍ട്ടുകള്‍ സമയ ബന്ധിതമായി ലഭിക്കാത്തതാണു നിശ്ചിത സമയത്തിനുള്ളില്‍ കുറ്റപത്രം നല്‍കുന്നതിനു തടസ്സമായി വരുന്നത്. നീതീകരിക്കാന്‍ കഴിയാത്ത കാരണങ്ങളാല്‍ കുറ്റപത്രം നല്‍കുന്നതു വൈകിയാല്‍ മേലുദ്യോഗസ്ഥന്‍ എന്ന നിലയില്‍ ബന്ധപ്പെട്ട ജില്ലാ പൊലിസ് മേധാവി, ക്രൈംബ്രാഞ്ച് എസ്.പി എന്നിവര്‍ വ്യക്തിപരമായി ഉത്തരവാദിത്വം ഏറ്റെടുക്കേണ്ടി വരുമെന്നും ബെഹ്‌റ വാര്‍ത്താക്കുറിപ്പില്‍ മുന്നറിയിപ്പു നല്‍കി.