തിരുവനന്തപുരം: കൊച്ചിയിലും തിരുവനന്തപുരത്തും ഓണ്‍ലൈന്‍ വഴി പെണ്‍വാണിഭം നടത്തിവന്ന സംഘത്തെ പൊലിസ് പിടികൂടി. ഓപ്പറേഷന്‍ ബിഗ് ഡാഡിയിലൂടെയാണ് 14 പേര്‍ പൊലിസ് വലയിലായത്.

തിരുവനന്തപുരത്തെ സൈബര്‍ പൊലിസ് സ്റ്റേഷനിലെത്തിച്ച ഇവരെ ചോദ്യം ചെയ്തുവരികയാണ്. പിടിയിലായവരില്‍ നാലുപേര്‍ സ്ത്രീകളാണ്. ഇതിലൊരാള്‍ ശ്രീലങ്കന്‍ സ്വദേശിനിയാണ്. നന്ദിനി(35) എന്നാണ് ഇവരുടെ പേര്. ഇന്നലെ വൈകിട്ട് 4.30 മുതല്‍ ഇന്നു പുലര്‍ച്ചെ 6 മണി വരെ നീണ്ട ഓപ്പറേഷനിലൂടെയാണ് പ്രതികളെ പിടികൂടിയത്.

ഇടപാടുകാരില്‍നിന്ന് ഏഴു സ്ത്രീകളെ അന്വേഷണ സംഘം മോചിപ്പിച്ചു. ഇതില്‍ രണ്ടു പേര്‍ പ്രായപൂര്‍ത്തിയാകാത്തവരാണെന്ന് പൊലിസ് പറഞ്ഞു. കഴിഞ്ഞ ഒന്നര മാസമായി നടത്തിയ രഹസ്യ നിരീക്ഷണത്തിന്റെ ഭാഗമായാണ് ഇന്നലെ റെയ്ഡ് നടത്തിയത്.

ചുംബന സമര നായകന്‍ രാഹുല്‍ പശുപാലനും ഭാര്യ രശ്മി ആര്‍.നായരും ഓണ്‍ലൈന്‍ പെണ്‍വാണിഭ കേസില്‍ അറസ്റ്റിലായതിനെതുടര്‍ന്ന് ഇത്തരം സംഘങ്ങള്‍ ഇടപാടുകള്‍ അതീവ രഹസ്യമാക്കിയായിരുന്നു നടത്തിയിരുന്നത്. ഇവരുടെ ഫോണ്‍കോളുകള്‍ നിരീക്ഷിച്ചാണ് പൊലിസ് ഇടപാടിന്റെ പുതിയ രീതികള്‍ മനസിലാക്കിയത്.

പിടിയിലായവരില്‍ ബംഗളൂരുവില്‍നിന്നും ഗള്‍ഫില്‍ നിന്നും വന്നവരുണ്ട്. ഇവരെ ചോദ്യം ചെയ്തു വരികയാണ്.