ഗോവ: ഐലീഗിലെ സൂപ്പര്‍ പോരാട്ടങ്ങളില്‍ വമ്പന്‍മാരായ ഈസ്റ്റ് ബംഗാളിനും ബംഗളൂരുവിനും ജയം. ഈസ്റ്റ് ബംഗാള്‍ എതിരില്ലാത്ത രണ്ടു ഗോളിന് ചര്‍ച്ചില്‍ ബ്രദേഴ്‌സിനെ പരാജയപ്പെടുത്തിയപ്പോള്‍ ബംഗളൂരു എതിരില്ലാത്ത മൂന്നു ഗോളിന് മുംബൈയെയാണ് പരാജയപ്പെടുത്തിയത്.
ചര്‍ച്ചിലിനെതിരേ ഹാവോകിപ്പ്, ഇവാന്‍ ബുകെന്‍യ എന്നിവരുടെ ഗോളുകളാണ് ഈസ്റ്റ് ബംഗാളിനെ ജയത്തിലെത്തിച്ചത്. മത്സരത്തില്‍ മൂന്നു മാറ്റങ്ങള്‍ വരുത്തിയെങ്കിലും പ്രകടനത്തില്‍ മികവ് പുലര്‍ത്താന്‍ ചര്‍ച്ചിലിനായില്ല. 31ാം മിനുട്ടില്‍ ഹാവോക്കിപ്പിലൂടെ അക്കൗണ്ട് തുറന്ന ഈസ്റ്റ് ബംഗാള്‍ ആദ്യ പകുതിയുടെ അധികസമയത്ത് രണ്ടാം ഗോളും സ്വന്തമാക്കി.
മുംബൈക്കെതിരേ സി.കെ വിനീതിന്റെ തകര്‍പ്പന്‍ ഹാട്രിക്കാണ് ബംഗളൂരുവിന് വമ്പന്‍ ജയം സമ്മാനിച്ചത്. ആദ്യ പകുതിയുടെ അധിക സമയത്ത് ആദ്യ ഗോള്‍ സ്വന്തമാക്കിയ വിനീത് 57, 65 മിനുട്ടുകളില്‍ ഗോള്‍ നേടി ഹാട്രിക്ക് തികച്ചു. ജയത്തോടെ പോയിന്റ് പട്ടികയില്‍ മുന്നിലെത്താന്‍ ബംഗളൂരുവിന് സാധിച്ചു.
ക്ലബിന്റെ ചരിത്രത്തിലെ ആദ്യത്തെ ഹാട്രിക്കാണ് വിനീത് സ്വന്തമാക്കിയത്.
ഗ്ലാമര്‍ താരങ്ങളുണ്ടായിട്ടും മത്സരത്തില്‍ മുംബൈക്ക് മികവിലേക്കുയരാന്‍ സാധിക്കാത്തത് ആരാധകരെ ഞെട്ടിക്കുകയും ചെയ്തു.