തിരൂരങ്ങാടി: ഖത്തര്‍ ഫൗണ്ടേഷന് കീഴിലുള്ള ഖത്തര്‍ ഡിബേറ്റ് സെന്റര്‍ സംഘടിപ്പിക്കുന്ന നാലാമത് രാജ്യാന്തര യൂനിവേഴ്‌സിറ്റി അറബിക് ഡിബേറ്റ് ചാംപ്യന്‍ഷിപ്പില്‍ ദാറുല്‍ഹുദാ ഇസ്‌ലാമിക് സര്‍വകലാശാല ടീം മത്സരിക്കും. 83 രാജ്യങ്ങളില്‍ നിന്നുള്ള വിവിധ സര്‍വകലാശാലകളിലെ ഡിഗ്രി തല വിദ്യാര്‍ഥികള്‍ തമ്മിലാണ് മത്സരം. ഏപ്രില്‍ ഏഴ് മുതല്‍ 12 വരെ നടക്കുന്ന രാജ്യാന്തര ചാംപ്യന്‍ഷിപ്പില്‍ അഞ്ച് യോഗ്യതാ മത്സരങ്ങളും ശേഷം ക്വാര്‍ട്ടര്‍ ഫൈനല്‍, സെമിഫൈനല്‍, പ്രീ ഫൈനല്‍, ഫൈനല്‍ എന്നീ റൗണ്ടുകളിലൂടെയായിരിക്കും ചാംപ്യന്മാരെ തിരഞ്ഞെടുക്കുക. ഇത്തവണ ഇന്ത്യയെ പ്രതിനിധീകരിച്ച് ദാറുല്‍ഹുദായും കാലിക്കറ്റ് സര്‍വകലാശാലയുമാണ് പങ്കെടുക്കുന്നത്. നാലംഗങ്ങളടങ്ങുന്ന ടീമുകളായിരിക്കും മത്സരിക്കുക.