ന്യൂഡല്‍ഹി: എന്‍ജിനീയറിങ്- മെഡിക്കല്‍ കോഴ്‌സുകളിലേക്കുള്ള പ്രവേശനം പോലെ ബി.എഡിനും ദേശീയതലത്തില്‍ പ്രവേശന പരീക്ഷ ഏര്‍പ്പെടുത്തുന്നു. സര്‍ക്കാര്‍ സ്‌കൂളുകളിലെ അധ്യാപനനിലവാരം ഉയര്‍ത്തുകയെന്ന ഉദ്ദേശത്തോടെയാണ് കേന്ദ്ര മാനവവിഭവശേഷി മന്ത്രാലയം പുതിയ പരിഷ്‌കാരം കൊണ്ടുവരുന്നത്.
ബി.എഡ് കോഴ്‌സുകള്‍ക്കുള്ള പ്രവേശനപ്പരീക്ഷയ്ക്കു പുറമെ, ബി.എഡ് കോളജുകള്‍ക്കുള്ള അംഗീകാര പത്രം, കോഴ്‌സ് പൂര്‍ത്തിയാക്കിയ ശേഷമുള്ള എക്‌സിറ്റ് ടെസ്റ്റ്, സര്‍ക്കാര്‍ സ്‌കൂള്‍ അധ്യാപകര്‍ക്കുള്ള നിര്‍ബന്ധിത പരിശീലനക്ലാസ് എന്നിവയും നടപ്പാക്കും. നടപടിക്രമങ്ങള്‍ തയാറാക്കാന്‍ മാനവ വിഭവശേഷിമന്ത്രാലയം എന്‍.സി.ടി.ഇ നിര്‍ദേശം നല്‍കിയിട്ടുണ്ട്. അധ്യാപകര്‍ സ്‌കൂളുകളില്‍ പതിവായി ഹാജരാവുന്നുണ്ടോയെന്നു ഉറപ്പുവരുത്താന്‍ ഓരോ സ്‌കൂളിനും കംപ്യൂട്ടര്‍ ടാബ്്‌ലറ്റ് നല്‍കും.