ന്യൂഡല്‍ഹി: മുതിര്‍ന്ന എ.എ.പി നേതാവ് കുമാര്‍ വിശ്വാസ് ബി.ജെ.പിയില്‍ ചേരുന്നുവെന്ന വാര്‍ത്ത പാര്‍ട്ടി നിഷേധിച്ചു. വരുന്ന ഉത്തര്‍പ്രദേശ് നിയമസഭാ തെരഞ്ഞെടുപ്പില്‍ ബി.ജെ.പി സ്ഥാനാര്‍ഥിയായി കുമാര്‍ വിശ്വാസ് മത്സരിക്കുമെന്നാണ് വാര്‍ത്ത പുറത്തു വന്നത്. എന്നാല്‍ വാര്‍ത്തയെ പരിഹസിച്ച് കുമാര്‍ വിശ്വാസ് തന്നെ രംഗത്തെത്തി. പ്രധാനമന്ത്രി ടി.ഡി.പിയില്‍ ചേരുന്നു. ഇനി ഈ വാര്‍ത്ത പ്രചരിപ്പിക്കൂ എന്നാണ് സംഭവത്തെകുറിച്ച് കുമാര്‍ വിശ്വാസ് പ്രതികരിച്ചത്. ട്വിറ്ററിലൂടെയാണ് അദ്ദേഹം തന്റെ കമന്റ് വ്യക്തമാക്കിയത്. പഞ്ചാബിലെ ആം ആദ്മി പാര്‍ട്ടിയുടെ തെരഞ്ഞെടുപ്പ് പ്രചാരണത്തില്‍ നിര്‍ണായക സ്ഥാനം വഹിക്കുന്നത് കുമാര്‍ വിശ്വാസാണ്.
ഇദ്ദേഹത്തിന്റെ സഹപാഠിയായിരുന്ന ഡല്‍ഹി ഉപമുഖ്യമന്ത്രി മനീഷ് സിസോദിയയും ഇത്തരം അസംബന്ധ വാര്‍ത്തകളെ പുച്ഛിച്ചു തള്ളുന്നുവെന്ന് ട്വീറ്റ് ചെയ്തു. 'പ്രധാനമന്ത്രി കോണ്‍ഗ്രസില്‍ ചേരുന്നുവെന്ന് തന്റെ കൈയില്‍ വിവരമുണ്ട്. അദ്ദേഹം രാഹുല്‍ ഗാന്ധിയുമായി കൂടിക്കാഴ്ച നടത്തി എന്നായിരുന്നു മനീഷ് സിസോദിയ ട്വീറ്റ് ചെയ്തത്.