കണ്ണൂര്‍: ഇരുചക്രവാഹനങ്ങളില്‍ പറക്കുന്നവര്‍ തലമറക്കരുതെന്ന മുന്നറിയിപ്പുമായി പൊലിസ് അസോസിയേഷന്‍. ഒന്നാം വേദിക്കു സമീപത്തെ പലിയനില്‍ ഒരുക്കിയ പ്രശ്‌നോത്തരി മത്സരത്തില്‍ വിജയികള്‍ക്ക് ഹെല്‍മറ്റ് സമ്മാനമായി നല്‍കിയാണ് പൊലിസ് കലോത്സവത്തിന്റെ ആനന്ദത്തിനിടയിലും വഴിക്കണ്ണൊരുക്കുന്നത്. പൊലിസ് അസോസിയേഷനും പൊലിസ് ഓഫിസേഴ്‌സ് അസോസിയേഷനും സംയുക്തമായാണ് ട്രാഫിക് ബോധവല്‍ക്കരണം നടത്തുന്നത്. പ്രശ്‌നോത്തരി മത്സരത്തിലെ വിജയികളെ രാവിലേയും വൈകുന്നേരവും നടക്കുന്ന നറുക്കെടുപ്പിലൂടെ കണ്ടെത്തും.

കലോത്സവ നഗരിയിലെത്തുന്നവര്‍ക്കു കുടിവെള്ളമൊരുക്കുന്നതിലും കാക്കിക്കുപ്പായക്കാര്‍ ജാഗ്രതയിലാണ്. പതിനായിരം ലിറ്റര്‍ വെള്ളം ഒരു ദിവസം ഉപയോഗിക്കുന്നുണ്ട്. രാത്രി എട്ടു മുതല്‍ 12 വരെ നടക്കുന്ന ചുക്കുകാപ്പി വിതരണവും കാണികള്‍ക്കും മത്സരാര്‍ഥികള്‍ക്കും അനുഗ്രഹമാണ്. കലോത്സവ ഘോഷയാത്രയിലും 4000ല്‍ അധികം പേര്‍ക്ക് തണ്ണിമത്തന്‍ വിതരണം ചെയ്തിരുന്നു.