ദോഹ: പ്രാദേശിക, രാജ്യാന്തര സംഘടനകളുമായി ചേര്‍ന്ന് കാരുണ്യ, മാനുഷിക പ്രവര്‍ത്തനങ്ങള്‍ ഏകോപിപ്പിക്കുന്നതിന് ജി.സി.സി തലത്തില്‍ പുതിയ സംവിധാനം രൂപീകരിക്കുമെന്ന് ജി.സി.സി സെക്രട്ടറി ജനറല്‍ ഡോ. അബ്ദുല്ലത്തീഫ് അല്‍ സയാനി പറഞ്ഞു. ഓര്‍ഗനൈസേഷന്‍ ഓഫ് ഇസ്‌ലാമിക് കോര്‍പ്പറേഷനിലെ(ഒ.ഐ.സി) കാരുണ്യപ്രവര്‍ത്തനങ്ങള്‍ക്ക് നേതൃത്വം നല്‍കുന്നവരെ ആദരിക്കാന്‍ ദോഹയില്‍ യു.എന്നിന്റെ ആഭിമുഖ്യത്തില്‍ സംഘടിപ്പിച്ച പരിപാടിയോടനുബന്ധിച്ചാണ് അദ്ദേഹം ഇക്കാര്യം വ്യക്തമാക്കിയത്.

സേവന സന്നദ്ധപ്രവര്‍ത്തന മേഖലയില്‍ ഏകീകൃത നിയമം പുറപ്പെടുവിക്കേണ്ടതിന്റെ പ്രാധാന്യത്തെക്കുറിച്ച് ജിസിസി രാജ്യങ്ങള്‍ തമ്മില്‍ പൊതുധാരണയായിട്ടുണ്ട്. ജിസിസി അംഗരാജ്യങ്ങളിലെ നേതാക്കള്‍ യുഎന്‍ കാരുണ്യപ്രവര്‍ത്തനങ്ങള്‍ക്ക് പ്രാധാന്യം നല്‍കുന്നുണ്ട്. ഇക്കാര്യത്തില്‍ പ്രതിബദ്ധതയോടെയാണ് ജിസിസി പ്രവര്‍ത്തിക്കുന്നത്.

സിറിയന്‍, യമനി ജനതകളെ സഹായിക്കുന്നതിനായി നിരവധി സമ്മേളനങ്ങള്‍ ജിസിസി സഹായത്തോടെ സംഘടിപ്പിക്കപ്പെട്ടത് ഇതിന്റെ തെളിവാണെന്നും അദ്ദേഹം പറഞ്ഞു. സന്നദ്ധമേഖലയില്‍ പ്രവര്‍ത്തിക്കുന്ന നേതാക്കളെ ബഹുമാനിക്കുന്നതിനെ അദ്ദേഹം പ്രശംസിച്ചു.

വിദേശകാര്യമന്ത്രി ശൈഖ് മുഹമ്മദ് ബിന്‍ അബ്ദുല്‍റഹ്മാന്‍ അല്‍താനിയുടെ ആഭിമുഖ്യത്തില്‍ നടത്തുന്ന പ്രവര്‍ത്തനങ്ങള്‍ അഭിനന്ദനാര്‍ഹമാണെന്ന് അദ്ദേഹം വ്യക്തമാക്കി. കാരുണ്യകാര്യങ്ങള്‍ക്കുള്ള യുഎന്‍ സെക്രട്ടറി ജനറലിന്റെ പ്രതിനിധിയായി ഡോ.അഹമ്മദ് ബിന്‍ മുഹമ്മദ് അല്‍ മുറൈഖിയെ തെരഞ്ഞെടുത്തത് ഗുണകരമാണ്. പുതിയ യുഎന്‍ പ്രതിനിധിയുമായി ജിസിസി കൂടുതല്‍ മികച്ച രീതിയില്‍ സഹകരിക്കുമെന്നും അദ്ദേഹം കൂട്ടിച്ചേര്‍ത്തു.