ചാവക്കാട്: സ്വകാര്യ ബസില്‍ 14 കാരിയായ വിദ്യാര്‍ഥിനിയെ ശല്യം ചെയ്ത പൂവാലന്‍ കസ്റ്റഡിയില്‍. പൊന്നാനി വെളിയങ്കോട് തണ്ണിത്തുറ സ്വദേശി കിഴക്കേതില്‍ അന്‍സാര്‍ മൂസയെയാണ് (25) ചാവക്കാട് പൊലിസ് കസ്റ്റഡിയിലെടുത്തത്.
ഇന്നലെ രാവിലെ 8.30 മണിയോടെ പൊന്നാനി ചാവക്കാട് റൂട്ടിലോടുന്ന സ്വകാര്യ ബസിലാണ് സംഭവം. ബ്ലാങ്ങാട് സ്വദേശിയായ 14 കാരി മന്ദലാംകുന്ന് കിണര്‍ ഭാഗത്തുള്ള ബന്ധു വീട്ടില്‍ നിന്ന് സ്‌കൂളിലേക്ക് ബസില്‍ വരുകയായിരുന്നു. ബസില്‍ നില്‍ക്കുകയായിരുന്ന പെണ്‍കുട്ടിയെ സമീപത്തെ സീറ്റിലിരുന്നിരുന്ന യുവാവ് കയറിപിടിച്ചുവെന്നാണ് പരാതി.
വിദ്യാര്‍ഥിനി ചാവക്കാട് സ്റ്റേഷനിലത്തെി പൊലിസിന് നല്‍കിയ പരാതിയിലാണ് അന്‍സാറിനെതിരെ പൊലിസ് കേസെടുത്തത്. ഗുരുവായൂര്‍ മേഖലയിലെ സ്വകാര്യ സ്‌കൂളില്‍ ഒമ്പതാം ക്ലാസ് വിദ്യാര്‍ഥിനിയാണ് പരാതിക്കാരി.