ചെര്‍പ്പുളശ്ശേരി: എക്‌സൈസ് റെയ്ഞ്ച് പാര്‍ട്ടി രഹസ്യാന്വേഷണ വിഭാഗം നടത്തിയ റെയ്ഡില്‍ തൃക്കടീരി കിഴൂര്‍ റോഡില്‍ വച്ച് കഞ്ചാവു പൊതികളുമായി യുവാവിനെ അറസ്റ്റു ചെയ്തു. പാലക്കാട് സ്വദേശി നമ്പ്രത്ത് വീട്ടില്‍ അബു താഹിര്‍ (30) ആണ് അറസ്റ്റിലായത്. പത്തു ഗ്രാം വീതമുള്ള അഞ്ചിലധികം പൊതികള്‍ താഹിറില്‍ നിന്നും പിടിച്ചെടുത്തു.
റോഡരികില്‍ വച്ച് ആവശ്യക്കാര്‍ക്ക് വില്‍പന നടത്തുകയാണ് പതിവ്. നേരത്തെ കഞ്ചാവ് കേസിലും മറ്റു കേസുകളിലും പ്രതിയായ ഇയാള്‍ ജാമ്യത്തിലിറങ്ങി ഭാര്യവീട് കേന്ദ്രീകരിച്ചാണ് കഞ്ചാവ് വില്‍പന നടത്തുന്നത്. ഉപഭോക്താവെന്ന വ്യാജേന മഫ്ടിയില്‍ എത്തിയാണ് പ്രതിയെ പിടികൂടിയത്.
എക്‌സൈസ് സംഘത്തില്‍ അസി.എക്‌സൈസ് ഇന്‍സ്‌പെക്ടര്‍  ഇ. ഗോപി, ശിവശങ്കരന്‍, സിവില്‍ ഓഫിസര്‍മാരായ ജോസ്, ബാസ്റ്റിന്‍, വിവേക് ഉണ്ടായിരുന്നു. പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.