വെള്ളനാട്: തൊണ്ടിനുള്ളില്‍ ഇരട്ട തേങ്ങകള്‍ കണ്ട് കര്‍ഷകന്‍ ഞെട്ടി. കാഴ്ചയുടെ പ്രശ്‌നമാണെന്നാണ് ആദ്യം കരുതിയത്.

കണ്ണ് വലിച്ചു തുറന്ന് തുറിച്ചു നോക്കിയപ്പോഴാണ് സംഗതി കത്തിയത്. ഒറ്റ തൊണ്ടിനുള്ളില്‍ ഇരട്ടത്തേങ്ങ. സംഗതി നാടു മുഴുവന്‍ അറിഞ്ഞു. തേങ്ങാ വിസ്മയം കാണാന്‍  വെള്ളനാട് ചാങ്ങ കിഴക്കേവീട്ടില്‍ ശശീന്ദ്രന്‍ നായരു (72) ടെ വീട്ടില്‍  ആളുകളുടെ തിരക്കായി.

ഇന്നലെ ഉച്ചയോടെ പൊതിക്കാന്‍ ശ്രമിക്കുന്നതിനിടെയടാണ്  ചകിരിക്ക് ചെറിയ കേടുവന്ന തേങ്ങ ശശീന്ദ്രന്റെ ശ്രദ്ധയില്‍പ്പെടുന്നത്. ചകിരി മാറ്റാന്‍ ശ്രമിക്കുന്നതിനിടെ തൊണ്ടിനുള്ളില്‍ ഇരട്ട തേങ്ങ.കര്‍ഷകന്‍ ആദ്യം അമ്പരന്നെങ്കിലും വീണ്ടും പരിശോധന നടത്തി.

ഉപയോഗയോഗ്യമാണോ എന്നറിയാനായി പിന്നെ ഒന്ന് കുലുക്കി. ഒരെണ്ണത്തിനുള്ളില്‍ വെള്ളത്തിന്റെ സാനിധ്യമറിഞ്ഞു. പിന്നെ പൊട്ടിച്ച് നോക്കാന്‍ നിന്നില്ല. ഇതിനിടിയില്‍ കാഴ്ചക്കാരും കൂടി. സാധാരണ തേങ്ങയുടെ വലിപ്പം മാത്രമേ ഉള്ളൂവെങ്കിലും ഇതിനുള്ളിലെ ഫലങ്ങള്‍ രണ്ടും സമം.

ഏകദേശം മുക്കാല്‍ കിലോയോളം ഭാരം വരുമെങ്കിലും തേങ്ങയുടെ കണ്ണുകള്‍ എതിര്‍ദിശകളിലാണ്. കാഴ്ചക്കാരുടെ തിരക്ക്  പരിഗണിച്ച് ഇരട്ടത്തേങ്ങ  ഭദ്രമായി സൂക്ഷിച്ചിരിക്കുകയാണ് ശശീന്ദ്രന്‍.