കാസര്‍കോട്: കാസര്‍കോട് ജനറല്‍ ആശുപത്രിയില്‍ പുതിയ കെട്ടിടത്തിന്റെ തറക്കല്ലിടല്‍ ചടങ്ങിനിടെ മുഖ്യമന്ത്രിക്കെതിരേ യുവമോര്‍ച്ചാ പ്രവര്‍ത്തകര്‍ കരിങ്കൊടി കാട്ടി. തടയാന്‍ ശ്രമിക്കുന്നതിനിടെ പൊലിസുകാര്‍ക്കും മറ്റും പരുക്കേറ്റു. ഇന്നലെ ഉച്ചയ്ക്ക് രണ്ടര യോടെയാണ് സംഭവം. എന്‍ഡോസള്‍ഫാന്‍ പാക്കേജില്‍ ഉള്‍പ്പെടുത്തി നബാഡ് സഹായത്തോടെ നിര്‍മിക്കുന്ന ആശുപത്രി കെട്ടിടത്തിന്റെ ശിലാസ്ഥാപനത്തിനായി, ചടങ്ങില്‍ അധ്യക്ഷയായ മന്ത്രി കെ.കെ ശൈലജ മുഖ്യമന്ത്രിയെ ക്ഷണിച്ചപ്പോള്‍ പിണറായി എഴുന്നേല്‍ക്കുന്നതിനിടയിലാണ് പത്തോളം യുവമോര്‍ച്ചാ പ്രവര്‍ത്തകര്‍ സദസിന് പുറത്ത് വച്ച് പൊലിസ് നോക്കിനില്‍ക്കേ കരിങ്കൊടി കാണിച്ച് മുദ്രാവാക്യം വിളിച്ചത്. കണ്ണൂരില്‍ ബി.ജെ.പി പ്രവര്‍ത്തകനെ സി.പി.എം പ്രവര്‍ത്തകര്‍ വെട്ടിക്കൊലപ്പെടുത്തിയതില്‍ പ്രതിഷേധിച്ചാണ് യുവമോര്‍ച്ചാ പ്രവര്‍ത്തകര്‍ കരിങ്കൊടി കാട്ടിയത്. മുഖ്യമന്ത്രിയെത്തുന്നതിനു മുന്‍പ് ബി.ജെ.പി സംസ്ഥാന കമ്മിറ്റിയംഗം പി. രമേശിന്റെ നേതൃത്വത്തില്‍ ജനറലാശുപത്രിയിലെയും നഗരസഭയിലെയും അനാസ്ഥക്കെതിരേ മുദ്രാവാക്യം വിളിച്ച് പ്രതിഷേധിച്ചിരുന്നു.