മൂവാറ്റുപുഴ: അഴിമതി ആരോപിച്ച് സംസ്ഥാന വിജിലന്‍സ് ഡയറക്ടര്‍ ജേക്കബ് തോമസിനെതിരേ മൂവാറ്റുപുഴ വിജിലന്‍സ് കോടതിയില്‍ നല്‍കിയ ഹരജിയില്‍ ഇന്നലെ പ്രാഥമിക വാദം നടന്നു. വിശദമായ വാദം കേള്‍ക്കുന്നതിനു കേസ് 23ലേക്കുമാറ്റി.
കൂടുതല്‍ തെളിവുകളുണ്ടെങ്കില്‍ അന്നു ഹാജരാക്കാന്‍ ഹരജിക്കാരന് കോടതി അനുമതി നല്‍കി. തുറമുഖ ഡയറക്ടറായിരിക്കെ സോളാര്‍ പാനല്‍ സ്ഥാപിച്ചതുമായി ബന്ധപ്പെട്ട് സംസ്ഥാന സര്‍ക്കാരിനു നഷ്ടം വരുത്തിയതു അഴിമതിയാണെന്നു കാണിച്ച് കൊച്ചി ക്രൈം ഇന്‍വെസ്റ്റിഗേഷന്‍ മാഗസിന്‍ എഡിറ്റര്‍ ചേര്‍ത്തല ചെങ്ങടകരി മൈക്കിള്‍ വര്‍ഗീസാണ് ഹരജി ഫയല്‍ ചെയ്തത്.
ഇതിനിടെ സംസ്ഥാന സര്‍ക്കാര്‍ പ്രതിയല്ലാത്ത സാഹചര്യത്തില്‍ ജേക്കബ് തോമസിനുവേണ്ടി വിജിലന്‍സ് ലീഗല്‍ അഡൈ്വസര്‍ കോടതിയില്‍ ഹാജരായതിനെ ഹരജിക്കാരന്റെ അഭിഭാഷകര്‍ എതിര്‍ത്തു.
സര്‍ക്കാര്‍ അഭിഭാഷകന്‍ വിജിലന്‍സ് ഡയറക്ടറുടെ പ്രവൃത്തികളെ ന്യായീകരിക്കുകയും ചെയ്തിരുന്നു.