കളമശേരി: കസ്റ്റംസ് സൂപ്രണ്ട് ഉള്‍പ്പെടെയുള്ള ഉദ്യോഗസ്ഥരെ ഏലൂരിലെ കൊച്ചിന്‍ ഇന്റര്‍ നാഷണല്‍ കണ്ടയിനര്‍ ഫ്രെയ്റ്റ് സ്‌റ്റേഷന്‍ ജീവനക്കാര്‍ രണ്ടു മണിക്കൂറോളം തടഞ്ഞുവെച്ചു. ഫ്രെയ്റ്റ് സ്‌റ്റേഷന് അകത്തുള്ള കസ്റ്റംസ് ഉദ്യോഗസ്ഥരെയാണ് വ്യാഴാഴ്ച 10 മുതല്‍ തടഞ്ഞുവെച്ചത്.
തങ്ങളുടെ കഞ്ഞികുടി മുട്ടിക്കാന്‍ കസ്റ്റംസ് ഉദ്യോഗസ്ഥര്‍ ശ്രമിക്കുന്നുവെന്നാരോപിച്ചായിരുന്നു സമരം. കസ്റ്റംസ് ഉദ്യോഗസ്ഥരെക്കുറിച്ച് പരാതി ലഭിച്ചതിനെ തുടര്‍ന്ന് ഈ ഫ്രെയ്റ്റ് സ്‌റ്റേഷനില്‍ സെപ്റ്റംബറില്‍ സി.ബി.ഐ റെയ്ഡ് നടത്തിയിരുന്നു. ഇതേത്തുടര്‍ന്ന് ചില കസ്റ്റംസ് ഉദ്യോഗസ്ഥര്‍ക്കെതിരെ നടപടി ഉണ്ടായി. ഈ സ്‌റ്റേഷനിലുണ്ടായിരുന്ന മുഴുവന്‍ കസ്റ്റംസ് ഉദ്യോഗസ്ഥരെ സ്ഥലം മാറ്റുകയും ചെയ്തു. ഈ സംഭവത്തെത്തുടര്‍ന്ന് കസ്റ്റംസ് ഉദ്യോഗസ്ഥര്‍ ഈ ഫ്രെയ്റ്റ് സ്‌റ്റേഷനോട് പ്രതികാര മനോഭാവത്തോടെയാണ് പെരുമാറുന്നതെന്ന് തൊഴിലാളികള്‍ പറഞ്ഞു. സി.ബി.ഐ റെയ്ഡുമായി തങ്ങള്‍ക്ക് യാതൊരു ബന്ധവുമില്ലെന്നും ഫ്രെയ്റ്റ് സ്‌റ്റേഷന്റെ മാനേജ്‌മെന്റായ കെ.എസ്.ഐ.ഇ ഉദ്യോഗസ്ഥരും കസ്റ്റംസ് ഉദ്യോഗസ്ഥും തമ്മിലുള്ള പോരില്‍ തങ്ങള്‍ ബലിയാടുകളാവുകയാണെന്നും തൊഴിലാളികള്‍ പറഞ്ഞു.
കസ്റ്റംസ് ഉദ്യോഗസ്ഥരുടെ പ്രതികാര നിലപാടുമൂലം കണ്ടെയ്‌നര്‍ ലോറികള്‍ ഈ സ്‌റ്റേഷനിലേക്ക് വരുന്നില്ല. ഇവിടെ 47 പുറം കരാര്‍ തൊഴിലാളികളുണ്ട്. ഇവര്‍ക്ക് ചെയ്യുന്ന പണിക്ക് മാത്രമെ കൂലി ലഭിക്കുകയുള്ളു. ഒരു ടണ്ണിന് 85 രൂപയും നൂറു ടണ്ണായാല്‍ ടണ്ണിന് 90 രൂപ നിരക്കിലുമാണ് കൂലി. ഡിസംബറില്‍ ഒരു തൊഴിലാളിക്ക് 50 ടണ്ണിനുളള കൂലിയാണ് കിട്ടിയത്. തൊട്ടടുത്തുള്ള ഫ്രെയ്റ്റ് സ്‌റ്റേഷനിലേക്ക് പ്രവേശിക്കാന്‍ കണ്ടയ്‌നര്‍ ലോറികള്‍ ദിവസങ്ങളോളം കാത്ത്കിടപ്പാണ്. എന്നിട്ടും കെ.എസ്.ഐ.ഇയുടെ ഫ്രെയ്റ്റ് സ്‌റ്റേഷനിലേക്ക് കണ്ടെയ്‌നര്‍ ലോറികള്‍ വരാത്തതിന് പിന്നില്‍ കസ്റ്റംസ് ഉദ്യോഗസ്ഥരാണെന്ന് തൊഴിലാളികള്‍ ആരോപിച്ചു. വി.പി മണി (എ.ഐ.ടി.യു.സി), എ.ജെ.അനസ് (സി.ഐ.ടി.യു), ഷിബു (ബി.എം.എസ്), ഫൈസല്‍ (ഐ.എന്‍.ടി.യു.സി) തുടങ്ങിയവര്‍ സമരത്തിന് നേതൃത്വം നല്‍കി.