വാഷിങ്ടണ്‍: സ്ഥാനമൊഴിയുന്ന യു.എസ് പ്രസിഡന്റ് ബരാക് ഒബാമ പ്രധാനമന്ത്രി നരേന്ദ്രമോദിയെ ഫോണില്‍ വിളിച്ച് നന്ദി അറിയിച്ചു. യു.എസുമായുള്ള ബന്ധം ശക്തമാക്കിയതിനാണ് ഒബാമ മോദിയോട് നന്ദി പറഞ്ഞത്. പ്രതിരോധം, സിവില്‍ ആണവോര്‍ജം, രാജ്യാന്തര സഹകരണം തുടങ്ങിയ മേഖലകളില്‍ ഇന്ത്യയുമായുള്ള ബന്ധം മെച്ചപ്പെടുത്തിയതിന് മോദി ഒബാമയോടും നന്ദി പറഞ്ഞു.
പ്രതിരോധ മേഖലയില്‍ ഇന്ത്യ, അമേരിക്കയുടെ ഉത്തമ പങ്കാളിയായി മാറുന്നതിനിടെ ഇരുരാജ്യങ്ങളും തമ്മിലുള്ള സാമ്പത്തിക സുരക്ഷാ മേഖലകളിലെ പുരോഗതിയും ഇരുവരും ചര്‍ച്ച ചെയ്തു. ഇരു നേതാക്കളും തമ്മില്‍ ഇതുവരെ എട്ടുതവണ കൂടിക്കാഴ്ച നടത്തിയിരുന്നു. ഇന്ത്യയുടെയും അമേരിക്കയുടെയും പ്രതിനിധികള്‍ തമ്മിലുള്ള കൂടിക്കാഴ്ചയില്‍ റെക്കോര്‍ഡ് ആണിത്.