വടകര: വടകരയിലും പരിസര പ്രദേശങ്ങളിലും കഞ്ചാവെത്തിക്കുന്ന സംഘത്തിലെ പ്രധാനികളായ രണ്ടുപേര്‍ ബംഗളൂരുവില്‍ അറസ്റ്റിലായി. ആയഞ്ചേരി സ്വദേശി കണിയാങ്കണ്ടി ഷരീഫ്(30), ആയഞ്ചേരി വാടിക്കുമീത്തല്‍ ഫൈസല്‍(31) എന്നിവരെയാണ് ബംഗളൂരു കന്റോണ്‍മെന്റ് റെയില്‍വേ പൊലിസ് അറസ്റ്റ് ചെയ്തത്.
ഇവരില്‍നിന്നും ഇരുപത് കിലോ കഞ്ചാവ് കണ്ടെടുത്തു. ജില്ലയിലെ വിവിധ സ്ഥലങ്ങളിലേക്ക് മൊത്തമായും ചില്ലറയായും കഞ്ചാവെത്തിക്കുന്ന സംഘത്തിലെ പ്രധാനികളാണ് ഇവര്‍. വടകര മേഖലയില്‍ വില്ല്യാപ്പള്ളി, ആയഞ്ചേരി പ്രദേശങ്ങളില്‍ കഞ്ചാവ് എത്തിക്കുന്നതും ഇവരാണെന്ന് പൊലിസ് പറഞ്ഞു.
ഈ സംഘത്തെകുറിച്ചും ഇവരുടെ കൂട്ടാളികളെക്കുറിച്ചും വടകര പൊലിസിന് വിവിരം ലഭിച്ചിരുന്നു. ഇതിന്റെ അടിസ്ഥാനത്തില്‍ അന്വേഷണം നടക്കുന്നതിനിടയിലാണ് ബംഗളൂരുവില്‍ ഇവര്‍ പിടിയിലായത്. ഇതില്‍ ഷരീഫ് വടകര സ്റ്റേഷനിലെ പിടികിട്ടാപ്പുള്ളിയാണ്. അടുത്തകാലത്ത് ഇയാള്‍ വീട്ടിലെത്തിയെങ്കിലും പൊലിസ് നിരീക്ഷിക്കുന്നുണ്ടെന്നുകണ്ട് ബംഗളൂരുവിലേക്ക് രക്ഷപ്പെടുകയായിരുന്നു. നിലില്‍ ഇവര്‍ക്കെതിരെയുള്ള കേസില്‍ ഹാജരാക്കാന്‍ വടകര പൊലിസ് കോടതി ഉത്തരവുമായി ബംഗളൂരുവിലേക്ക് പോയിട്ടുണ്ട്.