ന്യൂഡല്‍ഹി: ജെല്ലിക്കെട്ട് നിരോധനത്തില്‍ വിധി പറയുന്നത് സുപ്രിം കോടതി മാറ്റിവച്ചു. വിധിപറയുന്നത് ഒരാഴ്ചത്തേക്കാണ് സുപ്രിം കോടതി നീട്ടിവച്ചത്. കേന്ദ്ര സര്‍ക്കാരിന്റെ അസാധാരണ ആവശ്യത്തെത്തുടര്‍ന്നാണ് സുപ്രിം കോടതിയുടെ തീരുമാനം. തമിഴ്‌നാട്ടിലെ ക്രമസമാധാനം മുന്‍ നിര്‍ത്തിയാണ് കേന്ദ്രസര്‍ക്കാര്‍ വിധി പറയുന്നത് മാറ്റണമെന്ന് ആവശ്യപ്പെട്ടത്. 2016ല്‍ ജല്ലിക്കെട്ടിന് താല്‍ക്കാലിക അനുമതി നല്‍കിയതിനെതിരായ ഹരജി പരിഗണിക്കുന്നതാണ് ഇന്ന് സുപ്രിം കോടതി മാറ്റിവച്ചത്. പ്രശ്‌നങ്ങള്‍ പരിഹരിക്കുന്നത് വരെ വിധി പറയുന്നത് മാറ്റി വെക്കണമെന്ന ഹരജി സുപ്രിം കോടതി പരിഗണിക്കുകയായിരുന്നു.
ജെല്ലിക്കെട്ട് നിരോധനത്തിനെതിരേ ചെന്നൈയില്‍ കഴിഞ്ഞ ആഴ്ച ആരംഭിച്ച പ്രക്ഷോഭം ഇന്നും ശക്തമായി തുടരുകയാണ്. വന്‍ ജനപങ്കാളിത്തമാണ് പ്രക്ഷോഭത്തിനുള്ളത്. സിനിമാ,സംഗീത,രാഷ്ട്രീയ മേഖലിലെ മുഴുവന്‍ പേരുടെയും പിന്തുണയും പ്രക്ഷോഭത്തിനുണ്ട്.

ജെല്ലിക്കെട്ട് നിരോധനത്തില്‍ ഇടപെടമെണന്നാവശ്യപ്പെട്ട് ഇന്നലെ പ്രധാനമന്ത്രിയുമായി പനീര്‍സെല്‍വം കൂടിക്കാഴ്ച നടത്തിയിരുന്നു. എന്നാല്‍ സുപ്രിം കോടതിയുടെ പരിഗണനയിലുള്ള വിഷയമായതിനാല്‍ കേന്ദ്രത്തിന് ഇടപെടാന്‍ സാധിക്കില്ലെന്നാണ് മോദി അറിയിച്ചത്.