ദമാം: സഊദിയില്‍ കിഴക്കന്‍ പ്രവിശ്യയില്‍ ശീഈ പ്രദേശമായ ഖത്തീഫില്‍ നിരവധി കേസുകളിലെ പ്രതിയായ സ്വദേശി പൗരന്‍ മുഹമ്മദ് ഹുസയിന്‍ അല്‍ ഫറജ് സുരക്ഷാ സേനയുടെ പിടിയിലായി.

രാജ്യവിരുദ്ധ പ്രവര്‍ത്തനങ്ങളടക്കം നിരവധി കേസുകളില്‍ പൊലിസ് തിരഞ്ഞു വരികയായിരുന്ന പ്രധാന ഭീകരനാണിയാളെണെന്നു ആഭ്യന്തര മന്ത്രാലയ വക്താവ് മേജര്‍ ജനറല്‍ മന്‍സൂര്‍ അല്‍ തുര്‍ക്കിപറഞ്ഞു.

അതേസമയം, ഇയാളെ പിടി കൂടി നടത്തിയ അന്വേഷണത്തില്‍ ഖത്തീഫില്‍ തീവ്രവാദ കേസുകളുമായി ബന്ധമുള്ള ഒരേ കുടുംബത്തിലെ അഞ്ചു പേരെ സുരക്ഷസേന ഏറ്റുമുട്ടലിലൂടെ കീഴ്‌പെടുത്തി. ഖത്തീഫിലെ അവാമിയ്യയിലാണ് പൊലിസ് ഓപറേഷനിലൂടെ ആഭ്യന്തര മന്ത്രാലയം തിരയുന്ന കൊടുംകുറ്റവാളികളെ പിടികൂടിയത്.

ഹിറ്റ് ലിസ്റ്റില്‍ പെട്ട ഹുസൈന്‍ മുഹമ്മദ് അലി അല്‍ഫറജ്, മുഹമ്മദ് അലി അബ്ദുറഹീം അല്‍ഫറജ്, അബ്ദുറഹീം അബ്ദുറഹീം അല്‍ഫറജ്, അലി ബിന്‍ അഹമദ് അല്‍ഫറജ്, ഹുസെന്‍ മുദുന്‍ അല്‍ഫറജ് എന്നിവരെയാണ് പൊലിസ് പിടികൂടിയത്.

സംഭവ സ്ഥലത്ത് നിന്നും രക്ഷപ്പെട്ട മാജിദ് അബ്ദുറഹീം അല്‍ഫറജ്, സല്‍മാന്‍ അലി സല്‍മാന്‍ അല്‍ഫറജ് എന്നീ പ്രതികള്‍ക്കായുള്ള തിരച്ചില്‍ ശക്തമാക്കിയിട്ടുണ്ട്. സംഭവത്തെ തുടര്‍ന്ന് സ്ഥലം പൊലിസ് കാവലിലാണ്.