വാടാനപ്പള്ളി: ആര്‍.എസ്.എസ് പ്രവര്‍ത്തകരുടെ ആക്രമണത്തിനിരയായ സി.പി.എം പ്രവര്‍ത്തകന്റെ നില അതീവ ഗുരുതരമായി തുടരുന്നു. ഇക്കഴിഞ്ഞ ഞായറാഴ്ച രാത്രി ഏങ്ങണ്ടിയൂര്‍ പൊക്കുളങ്ങര പാലത്തിനു സമീപം ആക്രമണത്തിനിരയായ ഏങ്ങണ്ടിയൂര്‍ സ്വദേശി ചെമ്പന്‍ ശശികുമാര്‍ ഇപ്പോള്‍ വെന്റിലേറ്ററിലാണ്.
ശരീരമാസകലം ഇരുബ് പൈപ്പ് കൊണ്ട് മര്‍ദനമേറ്റതിനെ തുടര്‍ന്ന് വൃക്കയടക്കം ആന്തരികാവയവങ്ങളുടെ പ്രവര്‍ത്തനം തകരാറിലായി. രക്തസമ്മര്‍ദം വല്ലാതെ താഴുകയും ഹൃദയമിടിപ്പ് പരിധിവിട്ട് ഉയരുകയും ചെയ്തു. വെന്റിലേറ്ററില്‍ നിന്നും മാറ്റിയാല്‍ മറ്റു ചികിത്സകള്‍ പലതും നടത്താനാവാത്ത നിലയിലാണ് ഇപ്പോള്‍. വെട്ടേറ്റതിനെ തുടര്‍ന്ന് കാല് അറ്റ നിലയിലായിരുന്നു. ഇത് മുറിച്ചുമാറ്റേണ്ടിവരുമെന്നാണ് ഡോക്ടര്‍മാര്‍ പറയുന്നത്.
ഡോക്ടര്‍മാര്‍ ആവശ്യപ്പെട്ടതനുസരിച്ച് കഴിഞ്ഞ ദിവസം ബന്ധുക്കള്‍ ആശുപത്രിയിലെത്തി ശശികുമാറിനെ സന്ദര്‍ശിച്ചു. ഞായറാഴ്ച രാത്രി വീട്ടിലേക്ക് പോകുന്നതിനിടെയാണ് ശശിക്കു നേരെ ആക്രമണമുണ്ടായത്. സംഭവത്തില്‍ ആര്‍.എസ്.എസ് പ്രവര്‍ത്തകാരയ രണ്ടു പേരെ കഴിഞ്ഞ ദിവസം വാടാനപ്പള്ളി പൊലിസ് അറസ്റ്റു ചെയ്തിരുന്നു.
ശശിയെ ആക്രമിച്ചതില്‍ പരുക്കേറ്റ വടക്കാഞ്ചേരി ഷാജു പൊലിസ് കാസ്റ്റഡിയില്‍ ചികില്‍സയിലാണ്. എന്നാല്‍ അക്രമ സംഭവങ്ങളുമായി ബന്ധപ്പെട്ട് വാടാനപ്പള്ളി പൊലിസ് സ്റ്റേഷന്‍ പരിധിയില്‍ നിരോധനാജ്ഞ നാളെ അവസാനിക്കും.