കണ്ണൂര്‍:  ഹൈസ്‌കൂള്‍ വിഭാഗം  വഞ്ചിപ്പാട്ടില്‍ ആണ്‍മേല്‍ക്കോയ്മയെ വള്ളപ്പാടുകള്‍ക്ക് പിന്നിലാക്കി പെണ്‍പട ഫിനിഷ് ചെയ്തു. ഇന്നലെ വേദി കബനിയില്‍ നടന്ന വഞ്ചിപ്പാട്ട് മത്സരത്തിലാണ്. പെണ്‍കുട്ടികളുടെ ആധിപത്യംകൊണ്ട് ശ്രദ്ധേയമായത്. മത്സരിച്ച 26 ടീമുകളില്‍ വിരലിലെണ്ണാവുന്നവയില്‍ മാത്രമാണ് ആണ്‍കുട്ടികളുടെ സാന്നിധ്യം ഉണ്ടായിരുന്നത്. കുട്ടനാടന്‍ വഞ്ചിപാട്ടില്‍ പരമ്പരാഗതമായി പുരുഷന്മാരാണ് മികവു പുലര്‍ത്തിയിരുന്നതെങ്കിലും സമീപകാലങ്ങളില്‍ ഈ മേഖലകളില്‍ സ്ത്രീ സാന്നിദ്ധ്യം കൂടി വരികയാണ്.

വഞ്ചിപ്പാട്ടുകളില്‍ മിക്കവാറും സംഘങ്ങള്‍ രാമപുരത്ത് വാര്യരുടെ കുചേലവൃത്തം പാട്ടുകളായിരുന്നു തെരഞ്ഞെടുത്തത്. ഇത് കുട്ടനാടന്‍ ശൈലിയിലും ആറന്മുള ശൈലിയുമുള്ളതാണ്. ഇതിനു പുറമേ കുഞ്ചന്‍ നമ്പ്യാരുടെ തുള്ളല്‍ കൃതിയും വഞ്ചിപ്പാട്ട് രൂപത്തില്‍ മത്സരാര്‍ഥികള്‍ അരങ്ങിലെത്തിച്ചു. ആണ്‍,പെണ്‍ വ്യത്യാസമില്ലാതെ 26 ഗ്രുപ്പുകളാണ് മത്സരിച്ചത്. 23 പേര്‍ക്കും എ ഗ്രേഡ് ലഭിച്ചു.

ഇടുക്കി മുതലക്കൂടം സേക്രഡ് ഹാര്‍ട്ട് ഹൈസ്‌കൂള്‍ ഒന്നാം സ്ഥാനത്തെത്തിയപ്പോള്‍ പത്തനംതിട്ട കിടങ്ങൂര്‍ എസ്.വി.ജി.വി.എച്ച്.എസ്.എസിനാണ് രണ്ടാം സ്ഥാനം. ആലപ്പുഴ സെന്റ് മേരീസ് ഗേള്‍സ് എച്ച്.എസ് മൂന്നാം സ്ഥാനം നേടി.