സിഡ്‌നി: ആസ്‌ത്രേലിയയില്‍ ജലവിമാനം നദിയിലേക്ക് തകര്‍ന്നുവീണ് ആറുപേര്‍ മരിച്ചു. വടക്കന്‍ സിഡ്‌നിയില്‍നിന്ന് 50 കി.മീറ്റര്‍ അകലെയുള്ള കൗവാന്‍ നഗരത്തിനടുത്താണു സംഭവം. പുതുവത്സരാഘോഷത്തിനെത്തിയ വിനോദസഞ്ചാരികള്‍ കയറിയ വിമാനമാണ് അപകടത്തില്‍പെട്ടത്,
ഹോക്‌സ്ബറി നദിയില്‍ വിമാനം തകര്‍ന്നുവീഴുകയായിരുന്നു. 43 അടി താഴ്ചയിലായിരുന്ന വിമാനത്തിന്റെ അവശിഷ്ടങ്ങളില്‍നിന്ന് ആറുപേരുടെ മൃതദേഹങ്ങള്‍ കണ്ടെത്താനായിട്ടുണ്ട്. വിമാനത്തിന്റെ പൈലറ്റും 11കാരനും നാല് ബ്രിട്ടീഷ് പൗരന്മാരുമാണു മരിച്ചവര്‍. സിഡ്‌നിയിലെ പ്രശസ്ത ടൂര്‍ ഓപറേറ്റര്‍മാരായ സിഡ്‌നി സീപ്ലൈന്‍സിന്റെ ഒറ്റ എന്‍ജിനുള്ള വിമാനമാണ് അപകടത്തില്‍പെട്ടത്.
സിഡ്‌നി തുറമുഖത്തുനിന്ന് റോസ്‌ബേയിലേക്കുള്ള യാത്രാമധ്യേയാണ് വിമാനം തകര്‍ന്നുവീണത്. അപകട കാരണം ഇതുവരെ വ്യക്തമായിട്ടില്ല. സംഭവത്തില്‍ അന്വേഷണം ആരംഭിച്ചതായി അധികൃതര്‍ അറിയിച്ചു.