കണ്ണൂര്‍: നിളയുടെ കരകവിഞ്ഞൊഴുകിയ രാപ്പകലായിരുന്നു ഇന്നലെ കണ്ണൂരുകാര്‍ കണ്ടത്. രാവിലെ ഹൈസ്‌കൂള്‍ വിഭാഗം ആണ്‍കുട്ടികളുടെ കേരള നടനവും ഉച്ചക്കുശേഷം നടന്ന ഹൈസ്‌കൂള്‍ വിഭാഗം സംഘനൃത്തവും നടന്നത് തിങ്ങിനിറഞ്ഞ വേദിയിലായിരുന്നു. രാവിലെ മുതല്‍തന്നെ കസേരകളെല്ലാം നിറഞ്ഞ് കവിഞ്ഞിരുന്നു. പിന്നിടെത്തിയവര്‍ക്ക് സദസിന്റെ പിന്‍നിരയില്‍ നിന്നാണ് മത്സരങ്ങള്‍ കാണാനായത്.

തിരക്ക് വര്‍ധിച്ചതോടെ തൊട്ടടുത്ത് സ്ഥാപിച്ചിരുന്ന വലിയ സ്‌ക്രീനില്‍ തത്സമയ സംപ്രേഷണം നടത്തി. ഇവിടെയും തിരക്കിന് കുറവുണ്ടായില്ല. നിറഞ്ഞ സദസിനുമുന്‍പില്‍ പരിപാടികള്‍ അവതരിപ്പിക്കാന്‍ സാധിച്ചതില്‍ മത്സരാര്‍ഥികളും ഏറെ സന്തോഷത്തിലായിരുന്നു.

19 പേരാണ് രാവിലെ നടന്ന കേരള നടത്തില്‍ പങ്കെടുത്തത്. മികച്ച പ്രകടനമാണ് മത്സരത്തില്‍ പങ്കെടുത്തവരെല്ലാം കാഴ്ച്ചവച്ചത്. മൂന്നുപേര്‍ക്കൊഴികെ എല്ലാവര്‍ക്കും എഗ്രേഡും ലഭിച്ചു. അപ്പീലുമായെത്തിയ തിരുവനന്തപുരം ഗവ.മോഡല്‍ ബോയ്‌സ് എച്ച്.എസ്.എസിലെ പ്രിജുന്‍ എസ് പദ്മനാണ് ഒന്നാമതെത്തിയത്. ആലപ്പുഴ മുട്ടം ഹോളി ഫാമിലി എച്ച്.എസ്.എസിലെ വിഷ്ണു എസ്, മലപ്പുറം എം.എസ്.പി എച്ച.എസ്.എസിലെ അസ്റ്റിന്‍ റോയി എന്നിവര്‍ രണ്ടും മൂന്നും സ്ഥാനങ്ങള്‍ കരസ്ഥമാക്കി.