തിരുവനന്തപുരം: തിരുവനന്തപുരം മുക്കോല സെന്റ് തോമസ് സ്‌കൂളിലെ ആലിംഗന വിവാദം ഒത്തു തീര്‍പ്പായി. പെണ്‍കുട്ടിയെ തിരിച്ച് സകൂളില്‍ പ്രവേശിപ്പിക്കാമെന്ന് സകൂള്‍ അധികൃതര്‍ സമ്മതിച്ചു. ആണ്‍കുട്ടിയെ പരീക്ഷ എഴുതിപ്പിക്കാമെന്നും സ്‌കൂള്‍ മാനേജ്‌മെന്റ് കരാറില്‍ ഒപ്പുവച്ച് ഉറപ്പ് നല്‍കി. ജനുവരി മൂന്ന് മുതല്‍ പെണ്‍കുട്ടിക്ക് ക്‌ളാസില്‍ പ്രവേശിക്കാം. സസ്‌പെന്‍ഷനിലായിരുന്ന ദിവസങ്ങളിലെ ഹാജര്‍ സംബന്ധിച്ച് സി.ബി.എസ്.ഇ ബോര്‍ഡില്‍ നിന്ന് അനുമതി വാങ്ങാന്‍ സ്‌കൂള്‍ അധികൃതര്‍ തന്നെ മുന്‍കൈയെടുക്കാമെന്നും ധാരണയായി.
കഴിഞ്ഞ ജൂലൈ 21 നാണ് വിവാദത്തിനാസ്പദമായ സംഭവം. പാശ്ചാത്യ സംഗീത മത്സരത്തില്‍ പങ്കെടുത്ത പെണ്‍കുട്ടിയെ അഭിനന്ദിക്കാനാണ് ആലിംഗനം ചെയ്തത്. ഇത് സ്‌കൂളിന്റെ അച്ചടക്കത്തിന് വിരുദ്ധമാണെന്ന് ചൂണ്ടിക്കാട്ടിയാണ് വിദ്യാര്‍ഥികളെ സസ്‌പെന്‍ഡ് ചെയ്തതത്.
ഇവരെ തിരിച്ചെടുക്കണമെന്നാവശ്യപ്പെട്ടു ബാലാവകാശ കമ്മിഷന്‍ നല്‍കിയ നോട്ടിസിനെതിനെതിരേ സ്‌കൂള്‍ മാനേജ്മന്റ് കോടതിയെ സമീപിച്ചിരുന്നു. കോടതി വിധി മാനേജ്‌മെന്റിന് അനുകൂലമായിരുന്നു.
കുട്ടികളെ പരീക്ഷ എഴുതിപ്പിക്കാമെന്ന് നേരത്തെ മാനേജ്‌മെന്റ് സമ്മതിച്ചിരുന്നു. മറ്റു വിഷയങ്ങളില്‍ ജനുവരി മൂന്നാം തിയതിക്കകം ഒത്തുതീര്‍പ്പ് ഉണ്ടാക്കുമെന്നും മാനേജ്‌മെന്റ് അറിയിച്ചിരുന്നു. ശശി തരൂര്‍ എം.പിയുടെ ഇടപെടലിനെ തുടര്‍ന്നാണ് വിഷയം പരിഹരിക്കപ്പെട്ടത്.