തളിപ്പറമ്പ് : തളിപ്പറമ്പ് സ്റ്റേഷനിലെ വനിത എസ്.ഐയും എ.എസ്.ഐയും ഉള്‍പ്പെടെയുള്ളവര്‍ സഞ്ചരിച്ച വാഹനം കരിമ്പം പനക്കാട് സ്‌കൂളിനു സമീപം 100 അടിയോളം താഴ്ചയിലേക്കു മറിഞ്ഞതായി വ്യാജ സന്ദേശം.
തളിപ്പറമ്പിലെ മാധ്യമ പ്രവര്‍ത്തകര്‍ക്കാണു സന്ദേശം ലഭിച്ചത്. എസ്.ഐ വണ്ടിയില്‍ കുടുങ്ങി കിടക്കുകയാണെന്നും അപകടാവസ്ഥയിലാണെന്നുമായിരുന്നു സന്ദേശം. മാധ്യമ പ്രവര്‍ത്തകര്‍ പൊലിസ് സ്റ്റേഷനില്‍ അറിയിക്കുകയും സ്റ്റേഷനില്‍ നിന്ന് എസ്.ഐയെ ഫോണില്‍ ബന്ധപ്പെടാന്‍ ശ്രമിച്ചിട്ടു സാധിക്കാതെ വന്നപ്പോള്‍ സംശയം ബലപ്പെടുകയും ചെയ്തു. വഴിയില്‍ എസ്.ഐയും എ.എസ്.ഐയും സഞ്ചരിച്ച വാഹനം കണ്ടതോടെയാണ് വ്യാജ സന്ദേശമാണെന്ന് വ്യക്തമായത്.
മുക്കാല്‍ മണിക്കൂറോളം പൊലിസിനെയും മാധ്യമ പ്രവര്‍ത്തകരെയും മുള്‍മുനയിലാക്കിയ ആളെ പിടികൂടാനുള്ള ശ്രമത്തിലാണ് പൊലിസ്.