മാഡ്രിഡ്: സ്പാനിഷ് താരം ഡീഗോ കോസ്റ്റ പഴയ തട്ടകമായ അത്‌ലറ്റിക്കോ മാഡ്രിഡില്‍ തിരിച്ചെത്തി. ഇംഗ്ലീഷ് പ്രീമിയര്‍ ലീഗ് ടീം ചെല്‍സിയില്‍ നിന്നാണ് താരം അത്‌ലറ്റിക്കോയില്‍ തിരിച്ചെത്തുന്നത്. കഴിഞ്ഞ സെപ്റ്റംബറില്‍ തന്നെ കോസ്റ്റ ചെല്‍സി ടീമില്‍ നിന്ന് പിന്‍മാറിയിരുന്നെങ്കിലും ട്രാന്‍സ്ഫര്‍ നടപടിക്രമങ്ങള്‍ പൂര്‍ത്തിയാക്കി കഴിഞ്ഞ ദിവസമാണ് മാഡ്രിഡ് ടീമിനൊപ്പം ചേര്‍ന്നത്. അത്‌ലറ്റിക്കോ മാഡ്രിഡിനുള്ള ട്രാന്‍സ്ഫര്‍ വിലക്ക് നിലനിന്നതും താരത്തിന്റെ ടീമിലേക്കുള്ള പ്രവേശം വൈകിപ്പിച്ചു. നാല് വര്‍ഷം അത്‌ലറ്റിക്കോയില്‍ കളിച്ച ശേഷമാണ് കോസ്റ്റ 2014ല്‍ ചെല്‍സിയിലേക്ക് ചേക്കേറിയത്. കഴിഞ്ഞ സീസണില്‍ ചെല്‍സിയെ പ്രീമിയര്‍ ലീഗ് കിരീടത്തിലേക്ക് നയിക്കുന്നതില്‍ കോസ്റ്റ നിര്‍ണായക പങ്ക് വഹിച്ചിരുന്നു. എന്നാല്‍ തന്റെ തന്ത്രങ്ങള്‍ക്ക് യോജിച്ച താരമല്ല കോസ്റ്റയെന്ന് ചെല്‍സി കോച്ച് അന്റോണിയോ കോണ്ടെ തുറന്നടിച്ചതോടെയാണ് താരം ടീമില്‍ നിന്ന് പിന്‍മാറാനുള്ള തീരുമാനത്തിലെത്തിയത്. ഈ സീസണിന്റെ തുടക്കത്തില്‍ പല മത്സരങ്ങളിലും ആദ്യ ഇലവനില്‍ കോസ്റ്റയെ ഉള്‍പ്പെടുത്താന്‍ കോണ്ടെ തയ്യാറായതുമില്ല. ഇതോടെയാണ് പഴയ തട്ടകത്തിലേക്ക് തന്നെയുള്ള താരത്തിന്റെ മടക്കം യാഥാര്‍ഥ്യമായത്.