ലണ്ടന്‍: ആസ്‌ത്രേലിയക്കെതിരായ ഏകദിന പരമ്പരയ്ക്കുള്ള ഇംഗ്ലണ്ട് ടീമില്‍ നിന്ന് ഓള്‍ റൗണ്ടര്‍ ബെന്‍ സ്റ്റോക്‌സിനെ ഒഴിവാക്കി. ടെസ്റ്റ് പരമ്പരയില്‍ മികച്ച പ്രകടനം പുറത്തെടുത്ത ഡേവിഡ് മലനാണ് പകരം ടീമിലിടം പിടിച്ചത്. നേരത്തെ സ്റ്റോക്‌സിനെ ടീമില്‍ ഉള്‍പ്പെടുത്തിയിരുന്നെങ്കിലും ബ്രിസ്റ്റോള്‍ നിശാ ക്ലബിലുണ്ടായ തര്‍ക്കവുമായി ബന്ധപ്പെട്ട കേസിന്റെ നടപടി ക്രമങ്ങള്‍ തീരാത്ത സാഹചര്യം നിലനില്‍ക്കുന്നതിനാലാണ് താരത്തെ ഒഴിവാക്കിയത്. സസ്‌പെന്‍ഷന്‍ നിലനില്‍ക്കുന്നുണ്ടെങ്കിലും താരത്തിന് ഇന്ത്യന്‍ പ്രീമിയര്‍ ലീഗ് പോരാട്ടങ്ങളടക്കമുള്ള ടൂര്‍ണമെന്റുകളില്‍ കളിക്കുന്നതിന് ഇംഗ്ലണ്ട് ബോര്‍ഡ് അനുമതി നല്‍കിയിട്ടുണ്ട്. ഈ മാസം 14നാണ് ആസ്‌ത്രേലിയയും ഇംഗ്ലണ്ടും തമ്മിലുള്ള ആദ്യ ഏകദിനം അരങ്ങേറുന്നത്.