കുന്ദമംഗലം: ഈ വര്‍ഷം എസ്.എസ്.എല്‍.സി പരീക്ഷയെഴുതുന്ന കുട്ടികള്‍ക്കായി മടവൂര്‍ ചക്കാലക്കല്‍ ഹൈസ്‌കൂള്‍ പി.ടി.എയുടെ ആഭിമുഖ്യത്തില്‍ അയല്‍പക്ക പഠന കേന്ദ്രങ്ങള്‍ തുടങ്ങി.
നരിക്കുനി, മടവൂര്‍, കുന്ദമംഗലം എന്നീ പഞ്ചായത്തുകളിലായി 13 പഠനകേന്ദങ്ങളാണ് ആരംഭിച്ചത്. രാത്രി ഏഴു മുതല്‍ ഒന്‍പതു വരെയാണ് ക്ലാസ്. പ്രദേശത്തെ എസ്.എസ്.എല്‍.സി പരീക്ഷയെഴുതുന്ന മറ്റു സ്ഥാപനങ്ങളില്‍ പഠിക്കുന്ന കുട്ടികള്‍ക്കും പഠനകേന്ദ്രങ്ങളില്‍ പ്രവേശനം അനുവദിക്കും. രക്ഷിതാക്കളുടെയും സാംസ്‌കാരിക സംഘടനകളുടെയും സാമൂഹ്യപ്രവര്‍ത്തകരുടെയും സഹകരണത്തോടെയാണ് ക്ലാസുകള്‍ നടത്തുന്നത്.
നരിക്കുനിയിലെ പഠനകേന്ദ്രത്തിന്റെ ഉദ്ഘാടനം പഞ്ചായത്ത് പ്രസിഡന്റ് വബിത നിര്‍വഹിച്ചു. ഹെഡ്മാസ്റ്റര്‍ രാജേന്ദ്രകുമാര്‍ അധ്യക്ഷനായി. ആമിന ടീച്ചര്‍ മുഖ്യപ്രഭാഷണം നടത്തി. ചൂലാംവയല്‍ പഠനകേന്ദത്തിന്റെ ഉദ്ഘാടനം മാക്കൂട്ടം എ.യം.യു.പി സ്‌കൂളില്‍ ഹെഡ്മാസ്റ്റര്‍ രാജേന്ദ്രകുമാര്‍ നിര്‍വഹിച്ചു. പി.ടി.എ പ്രസിഡന്റ് കെ.എം അബൂബക്കര്‍ അധ്യക്ഷനായി. രവീന്ദ്രന്‍ കുന്ദമംഗലം, സുബ്രഹ്മണ്യന്‍ കോണിക്കല്‍, എം.കെ ഉമ്മര്‍, ഷൗക്കത്ത്, സി. മുനീബ്, കോയ മാസ്റ്റര്‍, കെ. രഞ്ജിത്ത് പ്രസംഗിച്ചു.