കോഴിക്കോട്: റോഡരികില്‍ ആശുപത്രി മാലിന്യം തള്ളാനുള്ള ശ്രമം നാട്ടുകാര്‍ തടഞ്ഞു. എരഞ്ഞിപ്പാലം സി.ഡി.എ കോളനി റോഡില്‍ സഹകരണ ആശുപത്രിയുടെ മുന്‍പിലുള്ള ഓടയില്‍ ആശുപത്രിയിലെ കക്കൂസ് മാലിന്യം തള്ളാനെത്തിയ ടാങ്കര്‍ലോറിയാണ് നാട്ടുകാര്‍ തടഞ്ഞത്. ഞായറാഴ്ച പുലര്‍ച്ചെ ഒന്നരയോടെയാണ് സംഭവം.
പ്രദേശത്തു ഇന്നലെ നടന്ന പൊതുപരിപാടിയുടെ റിഹേഴ്‌സല്‍ നടത്തുന്നവരുടെ ശ്രദ്ധയില്‍ ഇത് പെടുകയായിരുന്നു. തുടര്‍ന്നു നാട്ടുകാരെത്തി വാഹനവും ഡ്രൈവറെയും സഹായിയെയും പിടികൂടി പൊലിസിലേല്‍പ്പിച്ചു. ഡ്രൈവര്‍ പട്ടാമ്പി സ്വദേശി കെ.പി മുഹമ്മദലി, മലപ്പുറത്തെ ഷഹീര്‍ എന്നിവരെയാണ് കസ്റ്റഡിയിലെടുത്തത്.
കൗണ്‍സിലര്‍ ടി.സി ബിജുരാജിന്റെ നേതൃത്വത്തില്‍ നാട്ടുകാരും റസിഡന്‍സ് അസോസിയേഷന്‍ പ്രവര്‍ത്തകരും ചേര്‍ന്നാണ് പിടിച്ചത്. മാലിന്യം തള്ളാന്‍ ശ്രമിച്ചവര്‍ക്കെതിരേ കര്‍ശന നടപടി സ്വീകരിക്കുമെന്ന് മേയര്‍ തോട്ടത്തില്‍ രവീന്ദ്രന്‍ പറഞ്ഞു.
രാത്രിസമയത്ത് ഈ ഭാഗങ്ങളില്‍ കക്കൂസ് മാലിന്യം തള്ളുന്നത് പതിവാണ്. കഴിഞ്ഞദിവസം മാലിന്യം തള്ളാന്‍ ശ്രമിച്ച ടാങ്കര്‍ലോറി പിടിക്കാന്‍ ശ്രമിച്ചെങ്കിലും സാധിച്ചില്ല. നടക്കാവ് പൊലിസ് പ്രതികളെ അറസ്റ്റ് ചെയ്തു.