റിയാദ്: വൈദ്യ ലോകത്ത് പ്രതീക്ഷകളുമായി ബ്രിട്ടീഷ് യുവതി ജീവിക്കുന്നത് ബാഗില്‍ കൊണ്ടു നടക്കുന്ന ആര്‍ട്ടിഫിഷ്യല്‍ ഹൃദയവുമായി.

39 കാരിയായ സല്‍വ ഹുസൈന്‍ എന്ന യുവതിയാണ് തന്റെ ജീവന്‍ ബാഗിലാക്കി സദാസമയവും ചാര്‍ജ് ചെയ്ത് ബാഗില്‍ തോളിലേന്തി ജീവിക്കുന്നത്.

വിശ്വസിക്കാന്‍ പ്രയാസമുണ്ടാകുന്ന വാര്‍ത്തയായ ഇതിനെ മിറാക്കിള്‍ എന്നാണ് മാധ്യമങ്ങള്‍ വിശേഷിപ്പിച്ചത്. ഹൃദയ സംബന്ധമായ രോഗം നേരിട്ടതിനെ തുടര്‍ന്ന് മരണം ഉറപ്പായപ്പോള്‍ ഒരു സംഘം വൈദ്യ സംഘം ആറു മണിക്കൂര്‍ നീണ്ട കഠിന ശസ്ത്രക്രിയയിലൂടെ ഹൃദയം ശരീരത്തിന് പുറത്ത് ഘടിപ്പിച്ച് ജീവിതത്തിലേക്ക് തിരിച്ചു കൊണ്ടുവരി കയായിരുന്നു.

രണ്ടു മക്കളുടെ ഉമ്മയായ യുവതി ഇക്കഴിഞ്ഞ ജൂലൈയിലാണ് ഹൃദയം നിലച്ചതിനെ തുടര്‍ന്ന് അടിയന്തിര ശസ്ത്രക്രിയക്ക് വിധേയയാത്. കിഴക്കന്‍ ലണ്ടനിലെ ഇല്‍ഫോര്‍ഡ് സ്വദേശിനിയായ യുവതിയെ ഹെയ്ര്‍ ഫീല്‍ഡ ആശുപത്രിയില്‍വച്ചാണ് ശസ്ത്രക്രിയ നടത്തിയത്. പ്രകൃതിദത്തമായ ആന്തരിക ഹൃദയം നിലച്ചതിനെ തുടര്‍ന്നാണ് ഭര്‍ത്താവ് ആര്‍ട്ടിഫിഷ്യല്‍ ഹൃദയത്തിന് സമ്മതം നല്‍കിയത്.

നെഞ്ച് തുറന്ന് ഹൃദയം പുറത്തെടുത്ത് ഒഴിവാക്കി പകരം ബാറ്ററിയില്‍ പ്രവര്‍ത്തിക്കുന്ന ആര്‍ട്ടിഫിഷ്യല്‍ ഹൃദയം വെച്ച് പിടിപ്പിക്കുകയായിരുന്നു. ഹൃദയ സംബന്ധമായ ലോകത്തെ ഏറ്റവും പ്രസിദ്ധമായ ആശുപത്രിയിലാണ് പിന്നീട് കാര്യങ്ങള്‍ കൈകാര്യം ചെയ്തത്.

116,000 യു എസ് ഡോളര്‍ ചിലവഴിച്ചാണ് മനുഷ്യ നിര്‍മിത ചേര്‍ത്ത് പിടിപ്പിച്ചത്. 6.8 കിലോ ഭാരമുള്ള ബാറ്ററിയില്‍ പ്രവര്‍ത്തിക്കുന്ന പമ്പ് ഉപയോഗിച്ചാണ് ഹൃദയം പ്രവര്‍ത്തിക്കുന്നത്. രക്തം സ്വീകരിക്കാനും തിരിച്ചയക്കാനും പ്ലാസ്റ്റിക് ട്യൂബുകള്‍ നെഞ്ചില്‍ നിന്നും വലിച്ചിട്ടുണ്ട്.

ബാഗില്‍ സൂക്ഷിച്ച ഈ ചലിക്കും ഹൃദയം സ്‌കൂള്‍ ബാഗ് പോലെ പുറത്ത് തൂക്കി നടക്കുകയാണിപ്പോള്‍ യുവതി. 'നേരത്തെ ഹൃദയ സംബന്ധമായ രോഗം മൂലം തളര്‍ന്ന ഞാന്‍ ഇപ്പോള്‍ ആശ്വാസം കൊള്ളുന്നതായും വീട്ടിലേക്ക് തിരിച്ചു വരാന്‍ സാധിച്ചതായും യുവതി വെളിപ്പെടുത്തി. ഇത് രണ്ടാം തവണയാണ് ബ്രിട്ടനില്‍ ആര്‍ട്ടിഫിഷല്‍ ഹൃദയംവച്ചു പിടിപ്പിക്കുന്നത്. നേരത്തെ 2011 ല്‍ 50 വയസ്സുകാരനിലാണ് ഇത് ആദ്യമായി വച്ചു പിടിപ്പിച്ച് പരീക്ഷിച്ച് വിജയം കണ്ടത്.