നിലമ്പൂര്‍: മുക്കട്ടയില്‍ ഇലക്ട്രോണിക്‌സ്, ഇലക്ട്രിക്കല്‍ ഉപകരണങ്ങളുടെ സര്‍വിസ് സെന്റര്‍ കത്തി നശിച്ചു. കടമ്പത്ത് മുകുന്ദന്റെ കടയ്ക്കാണ് തീപിടിച്ചത്. ചാര്‍ജ് ചെയ്യാന്‍ വച്ച ബാറ്ററിയില്‍നിന്ന് ഷോര്‍ട്ട് സര്‍ക്യൂട്ട് ഉണ്ടായതാണ് തീപിടിത്തത്തിന് കാരണമെന്നാണ് നിഗമനം. ഇന്‍വര്‍ട്ടറുകള്‍, ബാറ്ററികള്‍, സ്റ്റീരിയോകള്‍ തുടങ്ങിയ ഉപകരണങ്ങള്‍ നശിച്ചു. അഞ്ച് ലക്ഷം രൂപയുടെ നഷ്ടം കണക്കാക്കുന്നു. ഇന്നലെ കടക്കുള്ളില്‍നിന്ന് പുക ഉയരുന്നതു നാട്ടുകാരുടെ ശ്രദ്ധയില്‍പെട്ടതിനെ തുടര്‍ന്ന് നാട്ടുകാരാണ് രാവിലെയോടെ ഫയര്‍ഫോഴ്‌സിനെ വിവരമറിയിച്ചത്. നിലമ്പൂര്‍ ഫയര്‍‌സ്റ്റേഷന്‍ ഓഫിസര്‍ എം. അബ്ദുല്‍ ഗഫൂറിന്റെ നേതൃത്വത്തില്‍ ഫയര്‍ഫോഴ്‌സും നാട്ടുകാരും ചേര്‍ന്ന് തീ അണച്ചു.