അരീക്കോട്: അരീക്കോട് ടൗണിലും പരിസരപ്രദേശങ്ങളിലും ട്രാഫിക് പരിഷ്‌കരണം സംബന്ധിച്ചു പഞ്ചായത്ത് ബോര്‍ഡ് തീരുമാനമെടുത്തു മൂന്നു മാസം പിന്നിട്ടിട്ടും പരിഷ്‌കരണം നടപ്പാക്കാനായില്ല. പുത്തലം അങ്ങാടി മുതല്‍ മുക്കം റോഡുവരെയും എം.എസ്.പി ക്യാംപ് റോഡ്, ബസ് സ്റ്റാന്‍ഡ് പരിസരം എന്നിവിടങ്ങളിലും നടപ്പാക്കേണ്ട മുപ്പതോളം പരിഷ്‌കരണങ്ങള്‍ അടങ്ങിയ നോട്ടീസ് പഞ്ചായത്ത് അധികൃതര്‍ അരീക്കോട് പൊലിസിന് കൈമാറിയെന്നല്ലാതെ ഇതില്‍ ഒന്നുപോലും പ്രാവര്‍ത്തികമാക്കിയിട്ടില്ല.
എന്നാല്‍, ട്രാഫിക് പരിഷ്‌കരണത്തിന്റെ പേരില്‍ വഴിയോര കച്ചവടക്കാരെ ഒഴിപ്പിച്ചതോടെ വന്‍കിട കച്ചവടക്കാരെ സഹായിക്കാന്‍ നടത്തിയ നാടകമായിരുന്നുഇതെന്നും വഴിയോര കച്ചവടക്കാര്‍ ആരോപിക്കുന്നുണ്ട്. വ്യാപാരികള്‍, തൊഴിലാളികള്‍, രാഷ്ട്രീയ പാര്‍ട്ടി നേതാക്കള്‍ തുടങ്ങിയ എല്ലാ വിഭാഗങ്ങളെയും വിളിച്ചുചേര്‍ത്ത് അഭിപ്രായം സ്വീകരിക്കുകയും പൊതുജനങ്ങള്‍ക്ക് നിര്‍ദേശങ്ങള്‍ സമര്‍പ്പിക്കാന്‍ പ്രത്യേക ബോക്‌സ് തയാറാക്കുകയും ചെയ്തിരുന്നു പഞ്ചായത്ത് അധികൃതര്‍.
എന്നാല്‍, ഇതു പ്രാവര്‍ത്തികമാക്കാതിരുന്നതോടെയാണ് പഞ്ചായത്തിനെതിരേ ആരോപണം ഉയര്‍ന്നത്. ട്രാഫിക് പരിഷ്‌കരണം ഉടന്‍ നടപ്പിലാക്കണമെന്നാവശ്യപ്പെട്ട് അരീക്കോട് എസ്.ഐക്ക് വീണ്ടും നോട്ടീസ് നല്‍കുമെന്ന് പഞ്ചായത്ത് പ്രസിഡന്റ് അമ്പായത്തിങ്ങല്‍ മുനീറ പറഞ്ഞു.