കാളികാവ്: വെളിയന്തോട് ഇന്ദിരാഗാന്ധി സ്മാരക ആശ്രയ വിദ്യാലയത്തിലെ സ്റ്റുഡന്റ് പൊലിസ് ക്യാംപില്‍ കുട്ടികള്‍ക്ക് ആവേശംപകര്‍ന്ന് പൊലിസ് മേധാവികള്‍. പൊലിസ് മേധാവികളും ജനപ്രതിനിധികളും ഉള്‍പ്പെടെ നിരവധിപേര്‍ ക്യാംപില്‍ ആദിവാസി കുട്ടികള്‍ക്ക് ആവേശം പകരാനെത്തി.
സ്റ്റുഡന്റ് പൊലിസ് സംസ്ഥാന അസിസ്റ്റന്റ് നോഡല്‍ ഓഫിസര്‍ ക്രൈംബ്രാഞ്ച് എസ്.പി യു. അബ്ദുല്‍ കരീം ഒരു ദിവസം മുഴുവന്‍ കുട്ടികള്‍ക്കൊപ്പം ചേര്‍ന്ന് അനുഭവങ്ങള്‍ പങ്കുവച്ചു. വിവരാവകാശ നിയമങ്ങള്‍ ഉപയോഗിച്ച് അവകാശങ്ങള്‍ നേടിയെടുക്കാനും അദ്ദേഹം കുട്ടികള്‍ക്ക് പ്രചോദനം നല്‍കി. ക്യാംപിനിടയില്‍ വിദ്യാലയത്തിലെ യു.പി വിഭാഗം വിദ്യാര്‍ഥികള്‍ക്ക് ഫുട്‌ബോള്‍ വാങ്ങിച്ചുനല്‍കുകയും ചെയ്തു. ജില്ലാ നോഡല്‍ ഓഫിസറായ ഡിവൈ.എസ്.പി അബ്ദുല്‍ റഷീദ്, എസ്.പി അബ്ദുല്‍ കരീം എന്നിവര്‍ ചേര്‍ന്നാണ് പന്ത് വാങ്ങിനല്‍കിയത്. എസ്.പി അബ്ദുല്‍ കരീം ഗാര്‍ഡ് ഓഫ് ഓണര്‍ സ്വീകരിച്ചു.പ്രഥമാധ്യാപിക സൗദാമിനി അധ്യക്ഷയായി. നിലമ്പൂര്‍ എസ്.ഐ മനോജ് പറയറ്റ, കൃഷി ഓഫിസര്‍ ഷക്കീല സംസാരിച്ചു.