ജൊഹന്നാസ്ബര്‍ഗ്: ദക്ഷിണാഫ്രിക്കക്കെതിരായ ടി20 പരമ്പരയിലെ രണ്ടാം മത്സരത്തില്‍ ശ്രീലങ്കയ്ക്ക് വിജയം. മൂന്നു വിക്കറ്റിനാണ് ലങ്ക വിജയിച്ചത്. ഇതോടെ മൂന്നു മത്സരങ്ങളടങ്ങിയ പരമ്പരയില്‍ ഇരു ടീമുകളും ഓരോ മത്സരം വിജയിച്ച് 1-1നു സമനില പാലിക്കുന്നു. അവസാന മത്സരം പരമ്പര ജേതാക്കളെ നിര്‍ണയിക്കും.
ആദ്യം ബാറ്റു ചെയ്ത ദക്ഷിണാഫ്രിക്കയെ 19.3 ഓവറില്‍ 113 റണ്‍സില്‍ പുറത്താക്കിയ ലങ്ക 19.4 ഓവറില്‍ ഏഴു വിക്കറ്റ് നഷ്ടത്തില്‍ 119 റണ്‍സ് അടിച്ചെടുത്താണ് വിജയിച്ചത്. 50 പന്തില്‍ 54 റണ്‍സെടുത്തു പുറത്താകാതെ നിന്ന നായകന്‍ ആഞ്ജലോ മാത്യൂസിന്റെ പ്രകടനമാണ് ലങ്കന്‍ വിജയത്തിന്റെ കാതല്‍. ഓപണര്‍ ഡിക്ക്‌വെല്ല (22), ചാന്‍ഡിമല്‍ (22) എന്നിവരും തിളങ്ങി. ദക്ഷിണാഫ്രിക്കക്കായി കൗമാര താരം ലുംഗി നഗിഡി നാലു വിക്കറ്റുകള്‍ പിഴുതു.
നേരത്തെ ടോസ് നേടി ബാറ്റിങ് തിരഞ്ഞെടുത്ത ദക്ഷിണാഫ്രിക്കക്ക് മികച്ച സ്‌കോര്‍ സ്വന്തമാക്കാന്‍ സാധിച്ചില്ല. അരങ്ങേറ്റ മത്സരം കളിച്ച ചൈനമെന്‍ ബൗളര്‍ സന്‍ഡാകന്റെ നാലു വിക്കറ്റ് പ്രകടനമാണ് ദക്ഷിണാഫ്രിക്കയെ കുഴക്കിയത്. 29 റണ്‍സെടുത്ത ഓപണര്‍ ഹെയ്‌നോ കുനാണ് അവരുടെ ടോപ് സ്‌കോറര്‍. മധ്യനിരയില്‍ നായകന്‍ ബെഹാര്‍ദ്ദീന്‍ 27 റണ്‍സെടുത്തു.
നാലു വിക്കറ്റെടുത്ത സന്‍ഡാകനു പുറമെ ഉദന മൂന്നും കുലശേഖര രണ്ടും വിക്കറ്റുകള്‍ വീഴ്ത്തി.