തിരുവനന്തപുരം: ഓണ്‍ലൈന്‍ പെണ്‍വാണിഭ സംഘത്തിലെ 13പേര്‍ പിടിയില്‍. പൊലിസ് നടത്തിയ ഓപറേഷന്‍ ബിഗ് ഡാഡിയാണ് പ്രതികളെ വലയിലാക്കിയത്. അറസ്റ്റിലായവരില്‍ സീരിയല്‍ നടിയുമുണ്ട്. ഒന്‍പത് പുരുഷന്‍മാരും നാല് സ്ത്രീകളുമാണ് സംഘത്തിലുള്ളത്.
വെബ്‌സൈറ്റ് വഴിയും ഫേസ്ബുക്ക് വഴിയുമാണ് പെണ്‍വാണിഭം നടത്തിയിരുന്നത്. ഓണ്‍ലൈന്‍ പെണ്‍വാണിഭ സംഘത്തിലെ 39 പ്രതികള്‍ നേരത്തേ അറസ്റ്റിലായിരുന്നു. ഇതേത്തുടര്‍ന്ന് സംശയാസ്പദമായ ചില വൈബ്‌സൈറ്റുകള്‍ പൊലിസ് നിരീക്ഷിച്ചുവരികയായിരുന്നു. പൊലിസുകാര്‍ ആവശ്യക്കാരെന്ന വ്യാജേന ഇടനിലക്കാരെ ബന്ധപ്പെട്ടാണ് പെണ്‍വാണിഭസംഘത്തെ വലയിലാക്കിയത്. ആവശ്യക്കാരുണ്ടെന്നറിഞ്ഞ് സീരിയല്‍ നടി ബംഗളൂരുവില്‍ നിന്ന് വിമാനമാര്‍ഗമാണ് എത്തിയത്. ബുധനാഴ്ച രാത്രിയിലും ഇന്നലെ പുലര്‍ച്ചെയുമായി തിരുവനന്തപുരം, കൊച്ചി എന്നിവിടങ്ങളില്‍ നടത്തിയ രഹസ്യ ഓപറേഷനിലൂടെയാണ് പെണ്‍വാണിഭസംഘത്തെ പിടികൂടാനായത്. പിടിയിലായവരെ സൈബര്‍ പൊലിസ് ആസ്ഥാനത്ത് ചോദ്യംചെയ്തു വരികയാണ്. തിരുവനന്തപുരത്തുള്ള ഒരു അപ്പാര്‍ട്ടുമെന്റില്‍ വിവിധ ഏജന്റുമാര്‍ മുഖേന പെണ്‍കുട്ടികളെ എത്തിക്കുകയാണ് സംഘം ചെയ്തിരുന്നത്. ഡിജിപി ടി.പി സെന്‍കുമാറിന്റെ നിര്‍ദേശാനുസരണം ക്രൈംബ്രാഞ്ച് ഐ.ജി എസ്.ശ്രീജിത്തിന്റെ മേല്‍നോട്ടത്തില്‍ ക്രൈംബ്രാഞ്ചിന്റെയും സൈബര്‍ പൊലിസിന്റെയും നേതൃത്വത്തിലുള്ള പ്രത്യേക സംഘമാണ് പ്രതികളെ പിടികൂടിയത്. പെണ്‍കുട്ടികളെ കടത്തിക്കൊണ്ടുവരാന്‍ ഉപയോഗിച്ച അഞ്ച് കാറുകളും മൊബൈല്‍ ഫോണുകളും പൊലിസ് പിടിച്ചെടുത്തിട്ടുണ്ട്.