കൊച്ചി: സംസ്ഥാനത്തെ അഴിമതിക്കേസുകളിലെ വിജിലന്‍സ് അന്വേഷണങ്ങളില്‍ ആഴത്തിലുളള പരിശോധനയാണ് നടത്തുന്നതെന്ന് ഡയറക്ടര്‍ ജേക്കബ് തോമസ്.
അതിനാലാണ് പലതും ഇഴയുന്നതെന്നും അദ്ദേഹം പറഞ്ഞു. ഒരു പരാതി ലഭിക്കുമ്പോള്‍ ആ പരാതിയില്‍ പറഞ്ഞിരിക്കുന്ന കാര്യങ്ങളില്‍ എന്തെങ്കിലും വസ്തുതയോ സത്യമോ ഉണ്ടോയെന്നാണ് വിജിലന്‍സ് ആദ്യം പരിശോധിക്കുന്നത്. അതില്‍ എല്ലാ വസ്തുതകളും മനസ്സിലാക്കാന്‍ വേണ്ടി ആഴത്തില്‍ അന്വേഷിക്കേണ്ടതായി വരും. സ്വാഭാവികമായും അപ്പോള്‍ അന്വേഷണത്തിന് വേഗത കാണില്ല. ഉപരിതലത്തില്‍ എന്തെങ്കിലും മനസ്സിലാക്കാന്‍ വേണ്ടി മാത്രമാണെങ്കില്‍ പെട്ടന്ന് പൂര്‍ത്തിയാക്കാന്‍ സാധിക്കും. എന്നാല്‍ ഇപ്പോള്‍ വിജിലന്‍സ് നടത്തുന്നത് ഓരോന്നിന്റെയും മൂലകാരണം മനസ്സിലാക്കിയുളള അന്വേഷണമാണെന്നും അദ്ദേഹം പറഞ്ഞു.
എ.ഡി.ജി.പി ആര്‍ ശ്രീലേഖക്കെതിരായ പരാതിയില്‍ കഴമ്പുണ്ടോയെന്നാണ് വിജിലന്‍സ് പരിശോധിച്ചത്.പരാതിക്കാരന്‍ ആരെന്ന് നോക്കിയിട്ടില്ലെന്നും അദ്ദേഹം കൂട്ടിച്ചേര്‍ത്തു.