കുന്നംകുളം: പാര്‍ക്കാടി പൂരാഘോഷത്തിനിടെ സംഘര്‍ഷം. രണ്ടുപേര്‍ക്ക് പരിക്കേറ്റു.
ചിറ്റഞ്ഞൂര്‍ സ്വദേശികളായ സാമ്പ്രിക്കല്‍ ബിജു(45), കണ്ണാഞ്ചേരി അനി(48) എന്നിവര്‍ക്കാണു പരുക്കേറ്റത്. വൈകിട്ട് നാലോടെ ചിറ്റഞ്ഞൂര്‍ സെന്ററിനടുത്തുള്ള സരിഗ പൂരാഘോഷ പന്തലിലായിരുന്നു സംഘര്‍ഷം.
സി.പി.എം പ്രവര്‍ത്തകര്‍ നേതൃത്വം നല്‍കുന്ന സരിഗയുടെ ആഘോഷത്തിനിടയിലൂടെ ബി.ജെ.പി പ്രവര്‍ത്തകരുടെ നേതൃത്വത്തിലുള്ള ഭാഗവത് പ്രാദേശിക പൂരം കടന്നുപോകുമ്പോള്‍ ബിജുവിനെ അപ്രതീക്ഷിതമായി അക്രമിക്കുകയായിരുന്നുവെന്നാണു പറയുന്നത്. ആയുധം കൊണ്ടുള്ള വെട്ടില്‍ ഇയാളുടെ തലക്കു പരുക്കേറ്റു. കുന്നംകുളത്തെ സ്വകാര്യ ആശുപത്രിയില്‍ ചികിത്സയില്‍ കഴിയുന്ന ബിജുവിന്റെ തലയില്‍ ആറ് തുന്നലുണ്ട്.
അനിയുടെ തലയ്ക്കും കൈയിനും പരുക്കുണ്ട്. തലയില്‍ മൂന്നു തുന്നലുണ്ട്. താലൂക്ക് ആശുപത്രിയില്‍ പ്രാഥമിക ചികിത്സയ്ക്കുശേഷം ഇയാള്‍ നിര്‍ബന്ധിത ഡിസ്ചാര്‍ജ് വാങ്ങി പോയതായി ആശുപത്രി അധികൃതര്‍ പറഞ്ഞു. സംഭവവുമായി ബന്ധപ്പെട്ടു പത്തോളം പേരെ പൊലിസ് കസ്റ്റഡിയിലെടുത്തതായി സി.ഐ പറഞ്ഞു.