എരുമപ്പെട്ടി: ചാക്കില്‍ കെട്ടിയ മലമ്പാമ്പുകളുടെ ജഡം വനത്തിനുള്ളില്‍ ഉപേക്ഷിച്ച നിലയില്‍ കണ്ടെത്തി. പതിയാരം തൂമ്പില്‍ അമ്പലത്തിന് സമീപമുള്ള കോഴിക്കുന്ന് വനത്തിനുള്ളിലാണ് മലമ്പാമ്പുകളുടെ ജഡം കണ്ടെത്തിയത്.
ചാക്കിനുള്ളിലും തകരപ്പെട്ടിക്കുള്ളിലും പുറത്തുമായി പത്തോളം പെരുമ്പാമ്പുകളുടെ ജഡങ്ങളാണ് ജീര്‍ണിച്ചു പുഴുവരിച്ച നിലയില്‍ സമീപവാസികള്‍ കണ്ടെത്തിയത്.
മാംസവും തോലും നെയ്യും എടുക്കുന്നതിനായി പാമ്പുകളെ കൂട്ടത്തോടെ കൊന്നൊടുക്കിയവര്‍ വനപാലകരുടെ പിടിയിലകപ്പെടുമെന്നു കണ്ടപ്പോള്‍ വനത്തിനുള്ളില്‍ ഇവയെ ഉപേക്ഷിച്ചു കടന്നുകളഞ്ഞതാകാമെന്നാണു കരുതുന്നത്.
എരുമപ്പെട്ടി ഫോറസ്റ്റ് ഡെപ്യൂട്ടി റെയ്ഞ്ചര്‍ ഭാസി ബാഹുലേയന്റെ നേതൃത്വത്തില്‍ വനപാലകര്‍ സ്ഥലത്തെത്തി അന്വേഷണമാരംഭിച്ചു.