വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ സത്യപ്രതിജ്ഞാ ചടങ്ങിന് സാക്ഷിയായത് 3.06 കോടി. രാവിലെ 10 മുതല്‍ വൈകുന്നേരം ആറു വരെയുള്ള സമയത്തിനിടെയാണ് അമേരിക്കയില്‍ ഇത്രയും അധികം പേര്‍ വാഷിങ്ടണ്‍ ഡിസിയിലെ പ്രൗഡഗംഭീരമായ സത്യപ്രതിജ്ഞാ ചടങ്ങ് വീക്ഷിച്ചത്. ബരാക് ഒബാമ പ്രസിഡന്റായി 2009ല്‍ ചുമതലയേറ്റ അവസരത്തില്‍ 3.78 കോടി ജനങ്ങള്‍ വീക്ഷിച്ചെന്നും ഇതുമായി ബന്ധപ്പെട്ട കണക്കുകള്‍ പുറത്തുവിട്ട നീല്‍സെന്‍ റിപ്പോര്‍ട്ട് വ്യക്തമാക്കുന്നു. അമേരിക്കയില്‍ ഏറ്റവും കൂടുതല്‍ ആളുകള്‍ സാക്ഷിയായ രണ്ടാമത്തെ സത്യപ്രതിജ്ഞാ ചടങ്ങായിരുന്നു ഒബാമയുടേത്. പട്ടികയില്‍ ഒന്നാം സ്ഥാനത്ത് റൊണാള്‍ഡ് റീഗണാണ് ഇടംപിടിച്ചിരിക്കുന്നത്. 1981ല്‍ റെയ്ഗണ്‍ പ്രസിഡന്റാവുന്നതിന് സാക്ഷിയായത് 4.18 കോടി ജനങ്ങളായിരുന്നു. 1993ല്‍ ബില്‍ ക്ലിന്റണ്‍ പ്രസിഡന്റായപ്പോള്‍ 2.97 കോടിയും 2001ല്‍ ജോര്‍ജ് ഡബ്ലിയു ബുഷിന്റെ സത്യപ്രതിജ്ഞാ ചടങ്ങ് 2.9 കോടി ജനങ്ങളും സാക്ഷികളായിരുന്നു. രണ്ടാം സ്ഥാനത്ത് ഒബാമയാണെങ്കില്‍ മൂന്നാം സ്ഥാനത്തുള്ളത് 1977ല്‍ പ്രസിഡന്റായ ജിമ്മി കാര്‍ട്ടറാണ്. 3.41 കോടിയായിരുന്നു അന്ന് അമേരിക്കന്‍ പ്രസിഡന്റിന്റെ സത്യപ്രതിജ്ഞാ ചടങ്ങ് വീക്ഷിക്കാനെത്തിയത്.