മുംബൈ: രാജ്യത്ത് ഡിജിറ്റല്‍ ഇടപാടുകള്‍ പ്രോല്‍സാഹിപ്പിക്കുന്നതിനായി കേന്ദ്രസര്‍ക്കാര്‍ ആധാര്‍ പേ സംവിധാനം അവതരിപ്പിക്കുന്നു. വിരലടയാളം ഉപയോഗിച്ച് ഇടപാടുകള്‍ നടത്താവുന്ന സംവിധാനമാണ് ആധാര്‍ പേ.
കാര്‍ഡുകള്‍ക്കു പകരം ഈ സംവിധാനം ഉപയോഗിച്ചുള്ള ഇടപാടുകള്‍ വ്യാപകമാക്കാനാണ് കേന്ദ്രസര്‍ക്കാര്‍ ലക്ഷ്യമിടുന്നത്. കാര്‍ഡ് ഉപയോഗത്തേക്കാള്‍ കടുതല്‍ സൗകര്യപ്രദമാണെന്നതാണ് ആധാര്‍ പേ സംവിധാനത്തെ പ്രോത്സാഹിപ്പിക്കാന്‍ തീരുമാനം.
 വ്യാപാരികള്‍ക്ക് ആധാര്‍ പേ ഉപയോഗിച്ച് ഡിജിറ്റല്‍ ഇടപാടുകള്‍ നടത്താനാവുമെന്നതാണ് ഇതിന്റെ മറ്റൊരു ആകര്‍ഷണം. ഇതിനായി ആന്‍ഡ്രോയിഡ് ഫോണില്‍ ആധാര്‍ പേ ആപ്പ് ഡൗണ്‍ലോഡ്‌ചെയ്യണം. ഇതിന് ശേഷം ഉപഭോക്താക്കളുടെ ആധാര്‍ കാര്‍ഡ് നമ്പര്‍ വിരലടയാളം എന്നിവ ഉപയോഗിച്ച് വ്യാപാരികള്‍ക്ക് ഇടപാടുകള്‍ നടത്താം. കാര്‍ഡുകളോ പിന്‍ നമ്പറോ ഉപയോഗിക്കാതെ തന്നെ ഇടപാടുകള്‍ നടത്താന്‍ സാധിക്കുമെന്നതാണ് ആധാര്‍ പേ ഉപയോഗിക്കുന്നതുകൊണ്ടുള്ള ഗുണം.
ഇടപാടുകള്‍ നടത്തുന്നതിനായി വിരലടയാളം രേഖപ്പെടുത്തുന്നതിന് ബയോമെട്രിക് ഉപകരണം കൂടി ആവശ്യമാണ്. ഇതിന് 2,000 രൂപയാണ് നിലവില്‍ വിപണി വില.
രാജ്യത്തെ പല ബാങ്കുകളും ആധാര്‍ കാര്‍ഡ് ഉപയോഗിച്ച് ഇടപാടുകള്‍ നടത്താനുള്ള ആപ്പുകള്‍ വികസിപ്പിച്ചിട്ടുണ്ട്. ആധാര്‍ പേ ഉപയോഗിച്ച് ഇടപാടുകള്‍ പ്രോല്‍സാഹിപ്പിക്കാനുള്ള നടപടികളിലേയ്ക്ക് നീങ്ങാന്‍ ബാങ്കുകളും തയാറെടുക്കുന്നുണ്ട്.