ന്യൂഡല്‍ഹി: ഇ.എസ്.ഐ ആനുകൂല്യമുള്ള തൊഴിലാളികളുടെ സൂപ്പര്‍ സ്‌പെഷ്യാലിറ്റി ചികിത്സ നിഷേധിക്കുന്ന ഉത്തരവ് പിന്‍വലിക്കണമെന്ന് എന്‍.കെ.പ്രേമചന്ദ്രന്‍ എം.പി.
സൂപ്പര്‍ സ്‌പെഷ്യാലിറ്റി ചികിത്സ വേണമെങ്കില്‍ ചികിത്സ ആവശ്യമായ തീയതിക്ക് തൊട്ടു മുന്‍പുള്ള രണ്ട് വര്‍ഷങ്ങളില്‍ 156 ഹാജരും അതില്‍ രണ്ട് വിഹിത കാലയളവില്‍ 78 ഹാജരും മുടങ്ങാത്ത നാല് വിഹിത അടവും വേണമെന്ന വ്യവസ്ഥയാണ് തൊഴിലാളികള്‍ക്ക് ദോഷകരമാകുന്നതെന്ന് അദ്ദേഹം ലോക്‌സഭയില്‍ പറഞ്ഞു. വ്യവസ്ഥ നടപ്പാക്കിയതിലൂടെ കശുവണ്ടി തൊഴിലാളികള്‍ ഉള്‍പ്പെടെയുള്ളവര്‍ക്കും ആശ്രിതര്‍ക്കും സൂപ്പര്‍ സ്‌പെഷ്യാലിറ്റി ചികിത്സ നിഷേധിക്കപ്പെടുകയാണ്.
തോട്ടണ്ടിയുടെ ലഭ്യത കുറവ് കൊണ്ട് കശുവണ്ടി ഫാക്ടറികള്‍ പൂട്ടിയിടുന്ന സാഹചര്യത്തില്‍ നിബന്ധന പ്രകാരമുള്ള ഹാജര്‍നിലയും വിഹിത അടവും ഉണ്ടാകാത്തത് തൊഴിലാളികളുടെ ഭാഗത്തെ വീഴ്ചയല്ല. കര്‍ക്കശമായ വ്യവസ്ഥകള്‍ കൊണ്ടുവന്ന് കശുവണ്ടി തൊഴിലാളികള്‍ ഉള്‍പ്പെടെ സമൂഹത്തിന്റെ താഴെത്തട്ടിലുളള ഇ.എസ്.ഐ ആനൂകൂല്യമുള്ളവരുടെയും ആശ്രിതരുടെയും സൂപ്പര്‍ സ്‌പെഷ്യാലിറ്റി ചികിത്സ നിഷേധിക്കുന്നതും ഇന്‍ഷ്വറന്‍സ് ആനുകൂല്യ പരിധിയില്‍ നിന്നു അവരെ പുറത്താക്കുന്നതും ന്യായീകരിക്കാവുന്നതല്ലെന്നും പ്രേമചന്ദ്രന്‍ പറഞ്ഞു.
2017 ജൂലൈ 31 ലെ ചോദ്യോത്തര വേളയില്‍ വിഷയം ഉന്നയിച്ചപ്പോള്‍ അന്ന് തൊഴില്‍ വകുപ്പിന്റെ ചുമതലയുണ്ടായിരുന്ന മന്ത്രി ബന്ധാരു ദത്താത്രയെ തൊഴിലാളികള്‍ക്കു ഉണ്ടായ ബുദ്ധിമുട്ട് പരിഹരിക്കുവാന്‍ നടപടി സ്വീകരിക്കുമെന്ന് ഉറപ്പു നല്‍കിയതാണ്. എന്നാല്‍ നാളിതുവരെ വ്യവസ്ഥകളില്‍ ഇളവു വരുത്താനോ തൊഴിലാളികള്‍ക്ക് സൂപ്പര്‍ സ്‌പെഷ്യാലിറ്റി ചികിത്സ നിഷേധിക്കുന്നത് ഒഴിവാക്കാനോ നടപടി സ്വീകരിച്ചില്ല എന്നത് ഗൗരവതരമാണെന്നും തൊഴിലാളികള്‍ക്ക് ദോഷകരമായ വ്യവസ്ഥകള്‍ റദ്ദ് ചെയ്ത് മുന്‍പ് ഉണ്ടായിരുന്ന തരത്തില്‍ ലളിതമായ വ്യവസ്ഥകള്‍ പുനസ്ഥാപിക്കണമെന്നും അദ്ദേഹം ആവശ്യപ്പെട്ടു.