മാഡ്രിഡ്: സ്പാനിഷ് ലാ ലിഗയില്‍ ബാഴ്‌സലോണയ്ക്ക് തകര്‍പ്പന്‍ ജയം. മറുപടിയില്ലാത്ത നാലു ഗോളുകള്‍ക്ക് കറ്റാലന്‍ പട എയ്ബറിനെ പരാജയപ്പെടുത്തി. ഇടവേളയ്ക്കു ശേഷം എം.എന്‍.എസ് ത്രയം ഗോളടിച്ച മത്സരമെന്ന പ്രത്യേകതയും പോരാട്ടത്തിനുണ്ട്.
31ാം മിനുട്ടില്‍ ഡെനിസ് സുവാരസിന്റെ ഗോളില്‍ മുന്നിലെത്തിയ ബാഴ്‌സയ്ക്കായി രണ്ടാം പകുതിയിലാണ് എം.എന്‍.എസ് ത്രയം ഗോളുകള്‍ നേടിയത്. മെസ്സി 50ാം മിനുട്ടിലും ലൂയീസ് സുവാരസ് 68ാം മിനുട്ടിലും നെയ്മര്‍ 90ാം മിനുട്ടിലും വല ചലിപ്പിച്ചു.
 പട്ടികയില്‍ ഒരോ പോയിന്റ് വ്യത്യാസത്തില്‍ റയല്‍ മാഡ്രിഡ് 43 പോയിന്റുമായി ഒന്നാമതും സെവിയ്യ 42 പോയിന്റുമായി രണ്ടാം സ്ഥാനത്തും ബാഴ്‌സലോണ 41 പോയിന്റുമായി മൂന്നാമതും നില്‍ക്കുന്നു.
മറ്റൊരു മത്സരത്തില്‍ ശക്തരായ അത്‌ലറ്റിക്കോ മാഡ്രിഡ് തോല്‍വിയുടെ വക്കില്‍ നിന്നു സമനിലയുമായി രക്ഷപ്പെട്ടു. അത്‌ലറ്റിക്ക് ബില്‍ബാവോക്കെതിരേ 2-2നു സമനില പാലിച്ചാണ് അത്‌ലറ്റിക്കോ മുഖം രക്ഷിച്ചത്. മൂന്നാം മിനുട്ടില്‍ കോക്കെയുടെ ഗോളില്‍ അവര്‍ മുന്നിലെത്തിയെങ്കിലും രണ്ടു ഗോളുകള്‍ തിരിച്ചടിച്ച് ബില്‍ബാവോ മത്സരത്തില്‍ മുന്‍തൂക്കം നേടി. 80ാം മിനുട്ടില്‍ ഗ്രിസ്മാനാണ് അത്‌ലറ്റിക്കോക്ക് സമനില ഗോള്‍ സമ്മാനിച്ചത്.
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ചെല്‍സിയുടെ മുന്നേറ്റം തുടരുന്നു. ഹള്‍ സിറ്റിയെ 2-0ത്തിനു തകര്‍ത്ത് അവര്‍ പോയിന്റ് പട്ടികയില്‍ ബഹുദൂരം മുന്നില്‍. ഡീഗോ കോസ്റ്റ, ഗാരി കാഹില്‍ എന്നിവരാണ് ചെല്‍സിക്കായി വല ചലിപ്പിച്ചത്.

മിലാന്‍: എഡിന്‍ സെക്കോയുടെ ഒറ്റ ഗോളില്‍ ഇറ്റാലിയന്‍ സീരി എയില്‍ റോമ വിജയം സ്വന്തമാക്കി. മറുപടിയില്ലാത്ത ഒറ്റ ഗോളില്‍ കഗ്ലിയാരിയെയാണ് അവര്‍ കീഴടക്കിയത്.