നാദാപുരം: അളവില്‍ കൃത്രിമം കണ്ടെത്തിയതിനെ തുടര്‍ന്ന് പെട്രോള്‍ പമ്പില്‍ പ്രതിഷേധം. ഒടുവില്‍ ലീഗല്‍ മെട്രോളജി ഉദ്യോഗസ്ഥര്‍ സ്ഥലത്തെത്തി പരിശോധനയ്ക്ക് ശേഷം പമ്പിങ് മെഷീന്‍ സീല്‍ ചെയ്തു. കക്കംവെള്ളി കനാലിനു സമീപം പ്രവര്‍ത്തിക്കുന്ന ഭാരത് പെട്രോളിയത്തിന്റെ നാദാപുരം പമ്പിലാണ് കൃത്രിമം കണ്ടെത്തിയത്. കഴിഞ്ഞ ദിവസം രാത്രി പമ്പില്‍ പെട്രോള്‍ നിറയ്ക്കാനെത്തിയ ഓര്‍ക്കാട്ടേരി സ്വദേശി മീറ്ററിലെ സൂചികയില്‍ കണ്ട വ്യത്യാസം പമ്പുകാരുടെ ശ്രദ്ധയില്‍പ്പെടുത്തുകയായിരുന്നു. എന്നാല്‍ ഇത് അംഗീകരിക്കാന്‍ പമ്പിലെ ജീവനക്കാര്‍ തയാറായില്ല. ഇതേതുടര്‍ന്ന് ഇന്നലെ രാവിലെ മുതല്‍ യൂത്ത് ലീഗ് പ്രവര്‍ത്തകരും നാട്ടുകാരും ചേര്‍ന്ന് പമ്പ് ഉപരോധിക്കുകയായിരുന്നു.
തുടര്‍ന്ന് സ്ഥലത്തെത്തിയ നാദാപുരം എസ്.ഐ അഭിലാഷ് പണമടച്ച് പെട്രോള്‍ അളന്നു വാങ്ങി. ഇതില്‍ കൃത്രിമം ശ്രദ്ധയില്‍പ്പെട്ടതോടെ ലീഗല്‍ മെട്രോളജിക്ക് വിവരം കൈമാറുകയായിരുന്നു. ഉച്ചയോടെ പമ്പിങ് മെഷീന്‍ പരിശോധിച്ച് പരാതി ഉറപ്പുവരുത്തിയ ഉദ്യോഗസ്ഥര്‍ പൂട്ടി സീല്‍ ചെയ്തു. വിദഗ്ധ പരിശേധനയ്ക്കു ശേഷം പമ്പിനെതിരേ നിയമ നടപടി സ്വീകരിക്കും.
തുടര്‍ന്ന് പൊലിസും യൂത്ത് ലീഗ് നേതാക്കളും നടത്തിയ ചര്‍ച്ചയില്‍ പമ്പിലെ മറ്റു മെഷീന്‍ ഉപയോഗിച്ച് എണ്ണ വിതരണം നടത്താന്‍ അനുമതി നല്‍കി. സി.കെ നാസര്‍, കെ.കെ സി ജഅ്ഫര്‍, റഫീഖ് ഉപരോധത്തിന് നേതൃത്വം നല്‍കി. പമ്പില്‍ വളരെ നാളുകളായി അളവില്‍ കൃത്രിമം നടക്കുന്നതായി നാട്ടുകാര്‍ ആരോപിച്ചു. മാഹി സ്വദേശിയുടെ ഉടമസ്ഥതയിലുള്ളതാണ് പെട്രോള്‍ പമ്പ്.