കോഴിക്കോട്: അറുപതുകളിലും എഴുപതുകളിലും രാജ്യത്ത് ശക്തമായ വേരോട്ടമുണ്ടായിരുന്ന നക്‌സലിസത്തില്‍ നിന്നു കേരളത്തിലെ വിദ്യാര്‍ഥി സമൂഹത്തെ രക്ഷിച്ചത് കെ.എസ്.യുവിന്റെ ജാഗ്രതയായായിരുന്നെന്ന് മുന്‍ മുഖ്യമന്ത്രി ഉമ്മന്‍ ചാണ്ടി. വിദ്യാര്‍ഥികളെ ലക്ഷ്യംവച്ച് പ്രവര്‍ത്തിച്ച നക്‌സല്‍ പ്രസ്ഥാനത്തിന് കേരളത്തില്‍ കാര്യമായ സ്വാധീനം ചൊലുത്താന്‍ കഴിയാതെപോയത് അന്ന് കെ.എസ്.യു ക്യാംപസുകളില്‍ പുലര്‍ത്തിയ പൊതുബോധവും ജാഗ്രതയും കൊണ്ടു മാത്രമാണ്. എലത്തൂരില്‍ കെ.എസ്.യു ജില്ലാ കമ്മിറ്റിയുടെ നേതൃത്വ പരിശീലന ക്യാംപ് സന്ദര്‍ശിച്ച ശേഷം സംസാരിക്കുകയായിരുന്നു അദ്ദേഹം. ഇന്ന് കലാലയങ്ങളില്‍ ഇടതു വിദ്യാര്‍ഥി സംഘടനകള്‍ നടത്തുന്ന അക്രമരാഷ്ട്രീയം വിദ്യാര്‍ഥികളെ സംഘടനകളില്‍നിന്നു വിട്ടുനില്‍ക്കാന്‍ പ്രേരിപ്പിക്കുന്നതായും ഉമ്മന്‍ ചാണ്ടി പറഞ്ഞു.