ഫറോക്ക്: ചരക്കുനീക്കത്തിനു പ്രാമുഖ്യം നല്‍കി ബേപ്പൂര്‍ തുറമുഖത്തിന്റെ വികസനം വേഗത്തിലാക്കുമെന്നു വകുപ്പ് മന്ത്രി കടന്നപ്പള്ളി രാമചന്ദ്രന്‍. തുറമുഖ വികസനത്തിനായി എല്ലാവരുടെയും അഭിപ്രായങ്ങള്‍ ആരഞ്ഞതിനു ശേഷം ഉന്നതതല ചര്‍ച്ച നടത്തി പദ്ധതി തയാറാക്കും. ബേപ്പൂര്‍ തുറമുഖം സന്ദര്‍ശിച്ച ശേഷം മാധ്യമപ്രവര്‍ത്തകരോടു സംസാരിക്കുകയായിരുന്നു മന്ത്രി.
സംസ്ഥാനത്തു നിലവില്‍ പ്രധാനമായും റോഡ് മാര്‍ഗമാണ് ചരക്കുകളെത്തിക്കുന്നത്. ഇതു മാറ്റി കടല്‍മാര്‍ഗം ചരക്കുനീക്കമാക്കിയാല്‍ വരുമാനത്തിനൊപ്പം ഗതാഗതരംഗത്തെ പ്രയാസങ്ങളുമകറ്റാനാകും. ഇതിനായി സംസ്ഥാനത്തെ പോര്‍ട്ടുകളുടെ ശൃംഖല ശക്തിപ്പെടുത്തേണ്ടതുണ്ട്.
ബേപ്പൂരിന്റെ പൂര്‍വപ്രതാപവും പാരമ്പര്യവും നിലനിര്‍ത്തുന്ന വികസനം അനിവാര്യമാണ്. ഇതിനായി ഉദ്യോഗസ്ഥര്‍, ജനപ്രതിനിധികള്‍, ട്രേഡ് യൂനിയന്‍ നേതാക്കള്‍ എന്നിവരുമായും വിശദമായി ചര്‍ച്ച നടത്തുമെന്നും മന്ത്രി പറഞ്ഞു.
19 കോടി ചെലവഴിച്ചു വാങ്ങിയ വലിയ ക്രെയിന്‍ പ്രവര്‍ത്തനക്ഷമമാക്കി പഴയ ക്രെയിനുകള്‍ ഒഴിവാക്കാന്‍ ഉടന്‍ നടപടിയെടുക്കും. ലക്ഷദ്വീപിലേക്കുള്ള ചരക്കുനീക്കവും യാത്രയും സുഗമമാക്കുകയും തുറമുഖത്തെ തൊഴിലാളികള്‍ ഉന്നയിച്ച എല്ലാ കാര്യങ്ങളിലും ഉടന്‍ പരിഹാരമുണ്ടാക്കുകയും ചെയ്യുമെന്നും മന്ത്രി കൂട്ടിച്ചേര്‍ത്തു. കണ്ടെയ്‌നര്‍ കപ്പലുകള്‍ക്കും യാത്രാ കപ്പലുകള്‍ക്കും സുഗമമായി എത്തി തിരിച്ചുപോകാനുള്ള ദീര്‍ഘകാല പദ്ധതികള്‍ രൂപപ്പെടുത്തണമെന്നും പിന്നീട് പോര്‍ട്ട് ഓഫിസ് കോംപ്ലക്‌സില്‍ നടന്ന യോഗത്തില്‍ മന്ത്രി പറഞ്ഞു.
അവലോകന യോഗത്തില്‍ വി.കെ.സി മമ്മദ്‌കോയ എം.എല്‍.എ അധ്യക്ഷനായി. കോര്‍പറേഷന്‍ കൗണ്‍സിലര്‍മാരായ എന്‍. സതീഷ് കുമാര്‍, എസ്.എ ഷമീല്‍, കാലിക്കറ്റ് ചേംബര്‍ ഓഫ് കൊമേഴ്‌സ് ആന്‍ഡ് ഇന്‍ഡസ്ട്രി സെക്രട്ടറി ഡോ. എ.എം ഷരീഫ്, വൈസ് പ്രസിഡന്റ് സുബൈര്‍ കൊളക്കാടന്‍, ട്രേഡ് യൂനിയന്‍ നേതാക്കളായ യു. പോക്കര്‍, കെ. സിദ്ധാര്‍ത്ഥന്‍, അഡ്വ. എ.ഇ മാത്യു, ഹാര്‍ബര്‍ എന്‍ജിനീയറിങ് എക്‌സിക്യുട്ടീവ് എന്‍ജിനീയര്‍ എം.എ മുഹമ്മദ് അന്‍സാരി, ലക്ഷദ്വീപ് മാര്‍ക്കറ്റിങ് ഫെഡറേഷന്‍ സെക്രട്ടറി ആസാദ്, ടി.കെ അബ്ദുല്‍ ഗഫൂര്‍, എം.പി പത്മനാഭന്‍ സംസാരിച്ചു. പോര്‍ട്ട് ഓഫിസര്‍ ക്യാപ്റ്റന്‍ കെ. അശ്വനി പ്രതാപ് സ്വാഗതം പറഞ്ഞു.