കോഴിക്കോട്: കക്കൂസ് മാലിന്യം തള്ളാനെത്തിയ ടാങ്കര്‍ ലോറി നാട്ടുകാര്‍ പിടികൂടി പൊലിസിലേല്‍പ്പിച്ചു.
ഞായറാഴ്ച പുലര്‍ച്ചെ രണ്ടോടെ എരഞ്ഞിപ്പാലം പാസ്‌പോര്‍ട്ട് ഓഫിസിനടുത്തു നിന്ന് നടക്കാവിലേക്കുള്ള സി.ഡി.എ കോളനി റോഡില്‍ മാലിന്യം തള്ളാനുള്ള ശ്രമത്തിനിടെയാണ് ലോറി പിടികൂടിയത്.
അസമയത്തു ലോറി കണ്ടതോടെ നാട്ടുകാര്‍ പരിശോധന നടത്തുകയായിരുന്നു. തുടര്‍ന്നു സ്ഥലം കൗണ്‍സിലര്‍ ടി.സി ബിജുരാജ് എത്തി ലോറിയും ജീവനക്കാരായ പട്ടാമ്പി സ്വദേശി കെ.പി മുഹമ്മദലി, വള്ളുവമ്പ്രം സ്വദേശി ഷഹീര്‍, കീഴൂര്‍ സ്വദേശി രജി എന്നിവരെയും പിടികൂടി നടക്കാവ് പൊലിസിനു കൈമാറുകയായിരുന്നു.
ലോറിക്കു മുന്നിലായി പൈലറ്റ് വാഹനമായി ഒരു കാര്‍ എത്തിയിരുന്നതായും ഇവര്‍ കടന്നുകളഞ്ഞെന്നും കൗണ്‍സിലര്‍ പറഞ്ഞു.
മിനുറ്റുകള്‍ക്കകം മാലിന്യം റോഡില്‍ തള്ളാന്‍ കഴിയുന്ന തരത്തിലുള്ള വലിയ വാള്‍വാണ് ലോറിയില്‍ ഘടിപ്പിച്ചത്.
മുന്‍പും ഇവിടെ മാലിന്യം തള്ളാന്‍ ശ്രമമുണ്ടായിരുന്നു. ലോറി കസ്റ്റഡിയിലുണ്ടെന്നും കോര്‍പറേഷനാണു തുടര്‍നടപടി സ്വീകരിക്കേണ്ടതെന്നും പൊലിസ് പറഞ്ഞു.