കോഴിക്കോട്: രണ്ടുകിലോ കഞ്ചാവുമായി യുവാവ് പിടിയില്‍. കക്കോട് പെരിഞ്ചില അശ്വിനെയാണ് (20) മലാപറമ്പില്‍ നിന്ന് പിടികൂടിയത്. പാച്ചാക്കിലിനടുത്ത് ബൈക്ക് തെന്നിവീണ് യുവാക്കളിലൊരാള്‍ ഓടിപ്പോയതുമായി ബന്ധപ്പെട്ട് നാട്ടുകാര്‍ വിവരം പൊലിസിനെ അറിയിക്കുകയായിരുന്നു. തുടര്‍ന്നു നടത്തിയ പരിശോധനയില്‍ മലാപറമ്പ് ജങ്ഷനു സമീപം ബാഗുമായി നില്‍ക്കുന്നയാളെ ശ്രദ്ധയില്‍പ്പെടുകയും പരിശോധനയില്‍ കഞ്ചാവ് കണ്ടെടുക്കുകയും ചെയ്തു.
ബംഗ്ലരൂവില്‍ നിന്ന് 5000 രൂപക്ക് വാങ്ങി എത്തിക്കുന്ന കഞ്ചാവ് ഇവിടെ 50000 രൂപക്കാണ് ചെറു പാക്കുകളാക്കി വില്‍പന നടത്തുന്നത്. പിടിച്ചെടുത്ത കഞ്ചാവിന് ഒരു ലക്ഷം രൂപ വില വരും. വിദ്യാര്‍ഥികള്‍ക്ക് കഞ്ചാവ് എത്തിക്കുന്ന സംഘത്തെക്കുറിച്ച് ചേവായൂര്‍ സി.ഐ കെ.കെ ബിജുവിന്റെ നേതൃത്വത്തിലാണ് അന്വേഷണം നടത്തുന്നത്. കഞ്ചാവ് പരിശോധനയ്ക്ക് ചേവായൂര്‍ എസ്.ഐ യു.കെ ഷാജഹാന്‍, നടക്കാവ് സി.ഐ ടി.കെ അഷ്‌റഫ് നേതൃത്വം നല്‍കി.