സുല്‍ത്താന്‍ ബത്തേരി: പുലര്‍ച്ചെ വീട്ടില്‍നിന്നു അങ്ങാടിയിലേക്ക് പോകുന്ന വഴി കടുവയെ കണ്ട് ഭയന്നോടിയ കര്‍ഷകന് കുഴിയില്‍ വീണ് ഗുരുതര പരുക്ക്. മൂടക്കൊല്ലി ശ്രീനാരായണപുരം മാളിയേക്കല്‍ മണ്ണില്‍ പുത്തന്‍വീട് ജോസി(49)നാണ് പരുക്കേറ്റത്.
ഇന്നലെ പുലര്‍ച്ചെ ശ്രീനാരായണപുരത്തെ വീട്ടില്‍നിന്നും അങ്ങാടിയിലേക്ക് വരും വഴി വനത്തിനോട് ചേര്‍ന്നുള്ള വഴിയില്‍ കടുവയെ കാണുകയായിരുന്നു.
തുടര്‍ന്ന് ഭയന്നോടിയ ജോസ് സമീപത്തെ തോട്ടത്തിലെ കുഴിയില്‍ വീണു. കാലിന്റെ രണ്ട് എല്ലും പൊട്ടിയതടക്കം ശരീരമാസകലം പരുക്കേറ്റ ജോസിനെ ബത്തേരിയിലെ സ്വകാര്യആശുപത്രിയില്‍ പ്രവേശിപ്പിച്ചെങ്കിലും പിന്നീട് കോഴിക്കോട് മെഡിക്കല്‍ ആശുപത്രിയിലേക്ക് മാറ്റി. മൂടക്കൊല്ലി ഭാഗത്ത് സ്ഥിരമായി വന്യമൃഗശല്യം രൂക്ഷമാണ്.
മുമ്പ് സ്വകാര്യത്തോട്ടത്തില്‍ നിന്ന് ഫോറസ്റ്റുകാരുടെ നേതൃത്വത്തില്‍ കടുവയെ പിടികൂടിയിരുന്നു.
അന്ന് കടുവയുടെ ആക്രമണത്തില്‍ പ്രദേശവാസികളില്‍ ചിലര്‍ക്ക് പരുക്കേറ്റിരുന്നു. വന്യമൃഗശല്യം കുറക്കുന്നതിനായി അടിയന്തരമായി നടപടി സ്വീകരിക്കണമെന്നാണ് നാട്ടുകാരുടെ ആവശ്യം.