കഴിഞ്ഞ ദിവസം കര്‍ണാടകയില്‍ നിന്ന് ശബരിമല തീര്‍ഥാടകരെ കയറ്റിവന്ന കെ.എ 23 എ 151 എന്ന രജിസ്‌ട്രേഷന്‍ നമ്പറിലുള്ള ബസാണ് മുത്തങ്ങ ആര്‍.ടി.ഒ ചെക്ക് പോസ്റ്റ് അധികൃതര്‍ പിടികൂടിയത്.
വാഹനത്തിന്റെ രേഖകള്‍ പരിശോധിച്ചതില്‍ സംശയം തോന്നിയ ഉദ്യോഗസ്ഥര്‍ സാങ്കേതിക പരിശോധന നടത്തിയപ്പോഴാണ് തട്ടിപ്പ് വെളിവായത്. വാഹനത്തിന്റെ ചെയ്‌സില്‍ കൊത്തിയ നമ്പറും രജിസ്‌ട്രേഷന്‍ രേഖകളിലെ നമ്പറും വ്യത്യസ്ഥമായിരുന്നു. തുടര്‍ന്നാണ് ചെക്ക്‌പോസ്റ്റ് അധികൃതര്‍ വിദഗ്ധ പരിശോധന നടത്തിയത്.
ഇവര്‍ കാണിച്ച ചെയ്‌സ് നമ്പറുകളിലുള്ള വാഹനങ്ങള്‍ യാഥാക്രമം കെ.എ 34 4388, കെ.എ 12 5903 എന്നീ വാഹനങ്ങളുടേതാണെന്നും അധികൃതര്‍ കണ്ടെത്തി. ഈ രണ്ടു വാഹനങ്ങള്‍ക്കും ഈ ചെക്ക്‌പോസ്റ്റില്‍ തന്നെ 176400 രൂപയുടെ നികുതി കുടിശ്ശിക അടക്കാനുണ്ട്.
നികുതി വെട്ടിപ്പ് നടത്താന്‍ വാഹന ഉടമ വ്യാജ രജിസ്‌ട്രേഷന്‍ നമ്പറും രേഖകളുമായി സര്‍വിസ് നടത്തിയത്. കൂടാതെ അധികൃതരുടെ പരിശോധനയില്‍ വാഹനത്തിന് സാങ്കേതിക തകരാറുകളും കണ്ടെത്തിയിരുന്നു. തുടര്‍ നടപടികള്‍ക്കായി വാഹനം കസ്റ്റഡിയിലെടുത്ത് സുല്‍ത്താന്‍ ബത്തേരി പൊലിസിന് കൈമാറി. വാഹനത്തിലെത്തിയ ശബരിമല തീര്‍ഥാടകരെ മറ്റൊരു വഹനമെത്തിച്ചാണ് യാത്രയാക്കിയത്.
അന്യസംസ്ഥാന വാഹനങ്ങളുടെ നികുതി കുടിശിക പിരിവ് കര്‍ശനമാക്കിയതോടെയാണ് വ്യാജ രേഖകളുപയോഗിച്ചുള്ള സര്‍വിസുകള്‍ കൂടിയതെന്നും സാങ്കേതിക പരിശോധനയും നികുതി കുടിശിക പിരിച്ചെടുക്കുന്നതും കര്‍ശനമായി തുടരുമെന്നും വയനാട് ജോയിന്റ് ആര്‍.ടി.ഒ എസ് മനോജ് അറിയിച്ചു. രണ്ടു മാസം മുന്‍പ് കാട്ടിക്കുളം ആര്‍.ടി.ഒ ചെക്ക്‌പോസ്റ്റിലും സമാന രീതിയില്‍ വാഹനം പിടികൂടിയിരുന്നു.
മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ എസ് ഫ്രാന്‍സിസ്, പി.ആര്‍ മനു, അസി.മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരായ വി.എസ് സൂരജ്, കെ ദിവിന്‍, ജിന്‍സ് ജോര്‍ജ്, ഷബീര്‍ മുഹമ്മദ്, എം.വി അനില്‍ കുമാര്‍, വി.ടി ബിജു എന്നിവരടങ്ങിയ സംഘം പരിശോധനക്ക് നേതൃത്വം നല്‍കി.